„საქართველოს ეროვნული ბანკი ატარებს ღონისძიებებს. მე ვფიქრობ, ლარის კურსი დასტაბილურდა. რამდენიმე დღის განმავლობაში დოლარის კურსის შემცირების ტენდენცია მცირე, მაგრამ მაინც დაფიქსირდა. მიმაჩნია პროცესის არანაირ გართულებას ადგილი არ ექნება. ეს კურსი არის ახალი წონასწორული კურსი და ვფიქრობ ეკონომიკური პროცესები არათუ შეფერხდება არამედ დაჩქარდება კიდეც"- აცხადებს ნოდარ ხადური.
როგორც რამდენიმე დღის უკან გახდა ცნობილი, თუ ქვეყანაში ინფლაციური პროცესები გაგრძელდება ეროვნული ბანკი მონეტარული პოლიტიკის გამკაცრებას არ გამორიცხავს. როგორც სებ-ის პრეზიდენტმა გიორგი ქადაგიძემ 10 იანვარს გაკეთებულ კომენტარში აღნიშნა, თუ საჭირო გახდება სებ-ი პოლიტიკის გამკაცრებს, იმისთვის, რომ ინფლაცია სამიზნე ნიშნულის ფარგლებში იყოს.
„ყოველთვის როცა ლარის კურსის ამპლიტუდა იზრდება, საზოგადოებაში ჩნდება კითხვები. კიდევ ერთხელ მინდა გავიმეორო, რომ ჩვენ გვაქვს მცოცავი გაცვლითი კურსის პოლიტიკა. ეს თავისთავში მოიაზრებს იმას, რომ კურში, როგორც ეკონომისტები უწოდებენ, ე.წ. ავტომატური სტაბილიზატორია ეკონომიკაში მიმდინარე პროცესებისა. ბოლო 2 წლის განმავლობაში ადგილი აქვს დეფლაციურ ფონს. მთელი ამ პერიოდის განმავლობაში გვქონდა შერბილებული მონეტარული პოლიტიკა, ამას დაემთხვა მეოთხე კვარტაში ბიუჯეტის დეფიციტის ათვისება, რამაც კიდევ სხვა ფაქტორებთან ერთად წარმოშვა ზეწოლა გაცვლით კურსზე. თუ ჩვენ დავინახავთ, რომ ეს გადაიზრდება ინფლაციურ პროცესებში, დავიწყებთ პოლიტიკის გამკაცრებას იმისთვის, რომ ინფლაცია იყოს სამიზნე ნიშნულის ფარგლებში. განსაკუთრებით სენსიტიურია ის ნაწილი, ვისაც სესხი აღებული აქვს დოლარში, ხელფასი კი ლარშია. სწორედ ამიტომ ჩვენი პოლიტიკა არის ის, რომ ვუზრუნველყოთ მაქსიმალურად ლარში სესხის ხელმისაწვდომობა. შედეგი სახეზეა და სესხების ნახევარზე მეტი უკვე ლარშია გაცემული"- აღნიშნა ქადაგიძემ.