ფინანსთა მინისტრი კიდევ ერთხელ აფიქსირებს, რომ მისი უწყება მხარს უჭერს „საგადასახადო კოდექსში" შესატან ცვლილებებს, რომლის მეშვეობითაც სახელმწიფო უწყებებს გადამხდელის შესახებ არსებულ ინფორმაციაზე წვდომა ექნება. ხადურის განცხადებით, მისი უწყება „საგადასახადო კოდექსში" შესატან ცვლილებებს მხარს უჭერს და ეთანხმება.
„რაც შეეხება სახალხო დამცველისთვის ინფორმაციაზე წვდომის სრულად მინიჭებას. არსებობს კანონი, „სახალხო დამცველის შესახებ", რომლის მე-20 მუხლშიც წერია, რომ სახალხო დამცველს უფლება აქვს მოითხოვოს, მათ შორის კომერციული საიდუმლო, კანონით განსაზღვრული წესით. ამიტომ კანონი, ამ შემთხვევაში „საგადასახადო კოდექსი" მოგვყავს სრულ შესაბამისობაში. რაც შეეხება სამინისტროებისთვის ამ უფლების მინიჭებას. აი მაგალითად დღეს მთავრობის სხდომაზე განვიხილეთ საგადასახადო შეთანხმება. მთავრობას, რომ არ ქონდეს უფლება მიიღოს საგადასახადო ინფორმაცია, ის მაშინ საგადასახადო შეთანხმებას ელემენტარულად ვერ გააფორმებს. გარდა ამისა ბევრ უწყებას ჭირდება ანალოგიური ტიპის ინფორმაცია, ზოგს აქვს ამაზე წვდომა და ზოგსაც არა. მე მაგალითისთვის სხდომაზე მოვიყვანე დევნილთა და განსახლების სამინისტრო, როდესაც მას აქვს გარკვეული პროექტები მან უნდა იცოდეს კონკრეტული ბენეფიციარი დახმარების, მართლაც დგას თუ არა ამ დახმარების აუცილებლობის წინაშე. შემოსავლების სამსახური ამ ინფორმაციას გადასცემს კანონით განსაზღვრული წესით, თუმც ამ ინფორმაციის მიმღებ უწყებას უფლება არ აქვს გაასაჯაროვოს ეს ინფორმაცია, გადამხდელის თანხმობის გარეშე"- აცხადებს ფინანსთა მინისტრი.
