"ერთიანი ნაციონალური მოძრაობის" რეგიონული მდივანი ნუგზარ წიკლაური" ქართული ოცნების" ერთ-ერთი ლიდერის, ვახტანგ ხმალაძის გუშინდელ განცხადებას ეხმიანება, რომლის მიხედვითაც „ქურდული სამყაროს" წევრობასა და „კანონიერ ქურდობასთან" დაკავშირებული სისხლის სამართლის კოდექსის შესაბამისი მუხლი გადასახედია.
"ძალიან მძიმე მოსასმენია, როდესაც ახლა უკვე მმართველი პარტიის ერთ-ერთი ლიდერი, იურიდიულ საკითხთა საპარლამენტო კომიტეტის თავმჯდომარე ქურდული სამყაროს მიმართ ღია და აშკარა მხარდაჭერას გამოხატავს", - აღნიშნა ნუგზარ წიკლაურმა.
დეპუტატის თქმით, თუკი ამ ტიპის ცვლილებები განხორციელდება ეს იქნება მნიშვნელოვანი იდეოლოგიური მარცხი „ქურდული სამყაროს" წინაშე, განსაკუთრებით იმ ფონზე, როდესაც ნათლად ჩანს, რომ ქვეყანაში კრიმინალი იზრდება.
„ყველამ ვიცით, რომ დღეს ციხეს უკვე სრულად მართავს კრიმინალური სამყარო. ახლა უკვე ეს სამყარო გამოდის ციხიდან და ის იწყებს მართვას ჩვენს ქუჩებში, ამაში ებმებიან ჩვენი თანამოქალაქეები, მითუმეტეს, არასრულწლოვნები", - განაცხადა წიკლაურმა.
