აჭარის ავტონომიური რესპუბლიკის 2013 წლის ნაერთი ბიუჯეტი 7,3 %-იანი გადაჭარბებით შესრულდა. აჭარის ფინანსთა და ეკონომიკის სამინისტროს ინფორმაციით, 2013 წლის ნაერთი ბიუჯეტის გეგმა 174 მლნ 603 ათას 200 ლარი იყო, თუმცა წლის ბოლოს შესრულებამ 187 მლნ 277 ათას 800 ლარი შეადგინა, რაც იმას ნიშნავს, რომ გეგმა 12 მლნ 674 ათას 600 ლარის გადაჭარბებით, ანუ სულ ჯამში 7,3 %-ის გადაჭარბებითაა შესრულებული.
აღსანიშნავია, რომ 7 %-იანი გადაჭარბებითაა ასევე შესრულებული აჭარის 2013 წლის რესპუბლიკური ბიუჯეტი.
აჭარის ნაერთი ბიუჯეტის გადასახადების მუხლი 2013 წლის მონაცემებით, 105 %-ითაა შესრულებული, ხოლო სხვა შემოსავლების მუხლი კი - 117,3 %-ით. რაც შეეხება არაფინანსური აქტივების მუხლს ის - 110,1 %-ითაა შესრულებული.
რაც შეეხება მუნიციპალურ ბიუჯეტებს ყველაზე წარმატებულად შესრულებული შუახევის ბიუჯეტია, რადგანაც 2013 წლის 31 დეკემბრის მონაცემებით შუახევის ბიუჯეტი 216 %-ითაა შესრულებული.
სტატისტიკური ინფორმაციის მიხედვით, ბათუმის ბიუჯეტი შესრულებულია - 106 %-ით, ქობულეთის ბიუჯეტი - 131,7 %-ით, ხელვაჩაურის ბიუჯეტი -103,4 %-ით, ხოლო ხულოს ბიუჯეტი 131,7 %-ითაა შესრულებული. რაც შეეხება ქედას ბიუჯეტს ის 2013 წელს დეფიციტური აღმოჩნდა. როგორც ირკვევა 2013 წელს ქედას ბიუჯეტის გეგმა, მხოლოდ 93,7 %-ითაა შესრულებული.
