„აჭარა ტექსტილი" გაფართოებას განაგრძობს. დღეს, ქობულეთში, სოფელ ბობოყვათში შპს „აჭარა ტექსტილის" საწამოს ახალი შენობა გაიხსნა. როგორც აჭარის ფინანსთა და ეკონომიკის სამინისტროში განმარტავენ,
„აჭარა ტექსტილის" საწარმოს არსებული შენობის გვერდით, 5 ათასი კვ.მეტრი, დამატებით შენობის აგება, საწარმოს საქმიანობის გაფართოვების შედეგად გახდა აუცილებელი.
საერთაშორისო ბრენდის „პუმას" თხოვნით კომპანიამ პროდუქციის წარმოება გაზარდა. საწარმოს ახალი შენობის ამოქმედებისას დასაქმებულთა რიცხვი 1500-მდე გაიზრდება. შპს „აჭარა ტექსტილის" მიერ განხორციელებული ინვესტიცია ჯამში 8 მილიონ დოლარს შეადგენს.
ქობულეთში მოქმედი საწარმო „აჭარა ტექსტილი" საერთაშორისო ბრენდებს აწარმოებს, მათ შორის: Puma, Lotto, Erima. ახალი წლიდან კი საწარმო Nike-ის ბრენდის პროდუქციის წარმოებას დაიწყებს. „აჭარა ტექსტილის" საწარმოს იტალიის, შვეიცარიის, ჩეხეთისა და განას რეპუბლიკების საფეხბურთო ნაკრებ გუნდებთან აქვს გაფორმებული ხელშეკრულება.
აღსანიშნავია, რომ საწარმოს გახსნას დღეს აჭარის მთავრობის წევრებიც დაესწრნენ. "აჭარა ტექსტილის" პირველმა საწარმომ ფუნქციონირება 2009 წელს დაიწყო, სადაც წლიურად 3 მილიონი ერთეული სპორტული ტანისამოსი იკერება.
„უმნიშვნელოვანესი პროექტია. ბოლო რამდენიმე თვის განმავლობაში არაერთხელ შევხვდით კომპანიის წარმომადგენლებსა და ახალი ბრენდების დამკვეთებს, რის შედეგადაც შეკვეთა გაიზარდა, კომპანია გაფართოვდა და დასაქმებულთა რაოდენობამაც იმატა. პარალელურად მიმდინარეობს მუშახელის გადამზადება, რითაც ადგილობრივები კმაყოფილნი არიან."- განაცხადა აჭარის მთავრობის მეთაურმა არჩილ ხაბაძემ საწარმოს მონახულების შემდეგ.
