ტერიტორიული მთლიანობისათვის დაღუპული სამხედროების ოჯახის წევრებმა, ყოველთვიური კომპენსაციის მისაღებად, განცხადებით სოციალური მომსახურების სააგენტოს 2014 წლის 1 იანვრამდე უნდა მიმართონ.
კანონმდებლებმა 85 ხმით, ერთხმად მიიღეს „სახელმწიფო კომპენსაციისა და სახელმწიფო აკადემიური სტიპენდიის შესახებ" საქართველოს პარლამენტის წევრის, ირაკლი სესიაშვილის საკანონმდებლო ინიციატივა.
პროექტის თანახმად, საერთაშორისო სამშვიდობო ოპერაციების ან სხვა სახის სამშვიდობო საქმიანობის განხორციელებისას გარდაცვლილ საქართველოს თავდაცვის სამინისტროს მოსამსახურეთა ოჯახის წევრებს, აგრეთვე, საქართველოს ტერიტორიული მთლიანობისათვის, თავისუფლებისა და დამოუკიდებლობისათვის, აგრეთვე 1998 წლის მაისისა და 2004 წლის აგვისტოს მოვლენების დროს დაღუპულთა ან მიღებული ჭრილობების შედეგად გარდაცვლილთა ოჯახის წევრებს, 2014 წლის 1 იანვრიდან დაენიშნებათ ყოველთვიური კომპენსაცია, რომლის ოდენობა 2014 წელს შეადგენს 500 ლარს, ხოლო 2015 წლიდან - 1000 ლარს.
