ფინანსთა მინისტრის ნოდარ ხადურის განცხადებით, მთავარი პროკურორი ოთარ ფარცხალაძე წარმატებული ადამიანია და რაც არ უნდა მოიგონოს უგულავამ, ან ,,ნაციონალებმა" ყველა საქმე იქნება გამოძიებული და ბოლომდე მიყვანილი.
,,ოთარ ფარცხალაძე წარმატებული პროკურორია და რაც არ უნდა მოიგონოს უგულავამ, ან ,,ნაციონალური მოძრაობის" სხვა წევრებმა ფარცხალაძე და მთელი სისტემა, რომელიც ვალდებულია გამოიძიოს ფინანსური დარღვევის შესახებ, ყველა საქმე იქნება გამოძიებული და ბოლომდე მიყვანილი იქნება და ამას გარწმუნებთ. ამიტომ ჯობია ვისაუბრობთ იმ ათეულობით მილონ გაფლანგულ ლარზე, რომელსაც პროკურატურა და ფინანსთა სამინისტროს საგამოძიებო სამსახური ედავება უფლებამოსილება შეჩერებულ მერს", -განაცხადა ნოდარ ხადურმა ოთარ ფარცხალაძის მიმართ გამოთქმული ბრალდების საპასუხოდ.
შეგახსენებთ, რომ გიგი უგულავას ინფორმაციით, მთავარი პროკურორი ოთარ ფარცხალაძე გერმანიაში გასამართლებულია ყაჩაღობისთვის.
როგორც უგულავამ "ერთიანი ნაციონალური მოძრაობის" ოფისში გამართულ საგანგებო ბრიფინგზე განაცხადა, საქართველოს მთავრობამ, მანამ, სანამ საზოგადოება მიიღებს სრულ პასუხს ამ საქმესთან დაკავშირებით, ოთარ ფარცხალაძე თანამდებობას უნდა ჩამოაშოროს.
"საქართველოს მთავარი პროკურორი ოთარ ფარცხალაძე გასამართლებულია აუგსბურგის რაიონული სასამართლოს მიერ გერმანიის სისხლის სამართლის კოდექსის 249-ე და 252-ე მუხლებით ყაჩაღური ქურდობისთვის. ოთარ ფარცხალაძეს მიესაჯა ძირითადი სასჯელი პატიმრობა 1 წელი და 3 თვე აუგსბურგის სასჯელაღსრულების დაწესებულებაში. დამატებითი სასჯელის სახით განესაზღვრა პასიური საარჩევნო უფლებისა და გარკვეული თანამდებობის უფლების ჩამორთმევა. დამატებითი სასჯელი ძალაშია 2016 წლის 22 აგვისტომდე. განაჩენი კანონიერ ძალაში 2001 წლის 14 მარტს შევიდა. მე მოვითხოვ საქართველოს მთავრობისგან, დაუყოვნებლივ რეაგირებას, რომ მოხდეს თანამდებობიდან ჩამოშორება ოთარ ფარცხალაძის, ვიდრე საზოგადოება სრულად მიიღებს პასუხს ამ სისხლის სამართლის დანაშაულთან დაკავშირებით, რომელ საქმეშიც მსჯავრდებულია გერმანიაში საქართველოს დღევანდელი მოქმედი მთავარი პროკურორი", - განაცხადა უგულავამ.
მისივე თქმით, იმედი აქვს, რომ იუსტიციის მინისტრი თეა წულუკიანი ამ საქმეს გერმანიიდან გამოითხოვს".
