„რკინაბეტონის შპალის ქარხანის" ხელმძღვანელობის ბრალდებას შემოსავლების სამსახური ეხმიანება და განმარტავს, რომ უწყების მიერ საგადასახადო შეთანხმების პერიოდში შემოწმების ჩატარება კანონდარღვევა არ არის.
"შპს „რკინაბეტონის შპალის ქარხანის" მიერ გავრცელებულ ინფორმაციასთან დაკავშირებით, რომელიც შემოსავლების სამსახურის მიერ შპს „რკინაბეტონის შპალის ქარხნის" მიმართ განხორციელებულ ქმედებებს შეეხება, შემოსავლების სამსახური უფლებამოსილია განაცხადოს: საქართველოს საგადასახადო კოდექსის 49-ე მუხლის პირველი ნაწილის „ა" პუნქტის მიხედვით, საგადასახადო ორგანოებს კანონმდებლობით დადგენილი წესით უფლება აქვთ შეამოწმონ გადასახადის გადამხდელის ეკონომიკურ საქმიანობასთან დაკავშირებული ფინანსური დოკუმენტები, დეკლარაციები, გადასახადების გაანგარიშებისა და გადახდის სხვა დოკუმენტები. აღნიშნულიდან გამომდინარე, საგადასახადო პერიოდზე, რომელზეც გაფორმებულია საგადასახადო შეთანხმება, საგადასახადო შემოწმების ჩატარება კანონმდებლობით შესაძლებელია.
ამავე დროს, სსკ-ის 255-ე მუხლის მე-6 ნაწილის შესაბამისად, მოსამართლის ბრძანების გარეშე აკრძალულია პირის საქმიანობის უკვე შემოწმებული პერიოდის ხელმეორედ შემოწმება. შემოსავლების სამსახურის მიმართვის შესაბამისად, 2013 წლის პირველ ნოემბერს გამოიცა მოსამართლის ბრძანება შპს „რკინაბეტონის შპალის ქარხანის" საქმიანობის ხელახალი საგადასახადო შემოწმების შესახებ.
თბილისის საქალაქო სასამართლოს გადაწყვეტილება გადამხდელმა გაასაჩივრა ზემდგომ ინსტანციაში. თბილისის სააპელაციო სასამართლოს ადმინისტრაციულ საქმეთა პალატამ ძალაში დატოვა პირველი ინსტანციის გადაწყვეტილება და, შესაბამისად, უარი უთხრა გადამხდელს უსაფუძვლო პრეტენზიაზე.
შესაბამისად, შპს „რკინაბეტონის შპალის ქარხანის" ხელმძღვანელობის ბრალდება, შემოსავლების სამსახურის მიერ საგადასახადო შეთანხმების პერიოდში შემოწმების ჩატარების გამო, უწყების მიერ კანონის დარღვევის თაობაზე, უსაფუძვლოა და სიმართლეს არ შეესაბამება"- ნათქვამია შემოსავლების სამსახურის მიერ გავრცელებულ განცხადებაში.