"ნაციონალური მოძრაობის" პოლიტსაბჭოს საგანგებო სხდომის დასრულების შემდეგ, საპარლამენტყო უმცირესობის ლიდერმა დავით ბაქრაძემ ხუთი მოთხოვნა გააჟღერა. პირველი - შეიქმნას საგამოძიებო კომისია, რომელიც გამოიძიებს გიგი უგულავას მიერ დაყენებულ საკითხს, რომელიც ამ დღეებში საქალაქო სასამართლოზე ზეწოლას ეხება.
ბაქრაძის თმით, ეს საკითხი გამოძიებულ იქნას და კონკრეტული ტექნიკური ფაქტები იყოს ამოღებული.
მეორე საგამოძიებო კომისიის შექმნა, რომელიც გამოიძიებს ყოფილი პრემიერ-მინისტრის, ვანო მერაბიშვილის განცხადებას, მისი უკანონოდ გატაცებისა და მასზე განხორციელებული ზეწოლის შესახებ.
მესამე მოთხოვნა - ადამიანის უფლებათა და იურიდიული კომიტეტების ერთობლივი სხდომის გამართვა, სადაც პირველი და მეორე საკითხები იქნება განხილული.
მეოთხე მოთხოვნა - პარლამენტში სახალხო დამცველის მისვლა. უმცირესობის განმარტებით, ომბუდსმენმა ციხეში მოინახულა მერაბიშვილი და მათი საუბრის შესახებ უჩა ნანუაშვილმა ინფორმაცია მიაწოდოს პარლამენტარებს.
მეხუთე მოთხოვნა - პარლამენტში უმცირესობის ფორმატში დაგეგმილ შეხვედრაზე მთავარი პროკურორის მისვლა.
დავით ბაქრაძის თქმით, ისინი მოიწვევენ მთავარ პროკურორს, რადგან ძალიან ბევრი შეკითხვა დაგროვდა როგორც მერაბიშვილის, ასევე ბევრ სხვა თემასთან დაკავშირებით.
