თბილისის საკრებულოს მიერ საწვავისთვის გამოყოფილი თანხა სამჯერ აღემატება მთავრობის კანცელარიის გეგმიურ ხარჯს. ამის შესახებ, "ინფორმაციის თავისუფლების განვითარების ინსტიტუტის" (IDFI ) მიერ გავრცელებულ განცხადებაშია აღნიშნული რომელსაც ,,ჯი-ეიჩ-ენი" უცვლელად გთავაზობთ:,, 2013 წლის საწყისი 10 თვის განმავლობაში (იანვარი-ოქტომბერი) ქალაქ თბილისის საკრებულოს წევრებზე და აპარატის თანამშრომლებზე ერთობლივად გაცემულმა პრემიების საერთო რაოდენობამ შეადგინა 1 707 631 ლარი, საიდანაც საკრებულოს წევრებზე გაცემულია 439 276 ლარი, ხოლო აპარატის თანამშრომლებზე 1 268 355 ლარი.
2012-2013 წლების განმავლობაში თბილისის საკრებულოს მიერ შესყიდულია 28 ავტომობილი, რომელთა საერთო ღირებულება შეადგენს 915 725 ლარს.
ქალაქ თბილისის საკრებულოს 2013 წლის სახელმწიფო შესყიდვების დაზუსტებული გეგმით, საწვავის შესყიდვისთვის გამოყოფილი თანხები დაახლოებით სამჯერ აღემატება მთავრობის კანცელარიის გეგმიურ ხარჯს, ისევე როგორც მთელი რიგი სამინისტროების მიერ დაგეგმილ შესყიდვებს.
2013 წლის 1 იანვრიდან 15 ნოემბრის ჩათვლით საკრებულოს წევრების მიერ ქვეყნის გარეთ სამუშაო ვიზიტებთან დაკავშირებით სამივლინებო ხარჯებმა შეადგინა 203 445 ლარი", _ნათქვამია განცხადებაში.
