"პროკრედიტ ბანკმა" ექსლიბრისების უნიკალური კოლექციის ხელნაწერთა ეროვნული ცენტრისთვის გადაცემის ღონისძიებას უმასპინძლა.
პროექტი „პროკრედიტ ბანკისა" და ხელნაწერთა ეროვნული ცენტრის ერთობლივი ინიციატივით განხორციელდა, რომლის ფარგლებშიც ბანკმა ექსლიბრისების უნიკალური კოლექცია საბერძნეთის ქალაქ თესალონკში მცხოვრები კერძო პირისგან შეიძინა.
ექსლიბრისებზე გამოსახული გრაფიკული ნამუშევრების დიდი ნაწილი ქართველი მხატვრების მიერ არის შესრულებული, შესაბამისად ამ კოლექციის შემატება ძალიან მნიშვნელოვანია ქართული ხელნაწერი მემკვიდრეობისათვის.
თითოეული გრაფიკული თუ კუთვინილებითი ექსლიბრისი ქართველი საზოგადო მოღვაწეების ცხოვრებისა და შემოქმედების შესახებ დამატებითი ინფორმაციის მატარებელია.
„პროკრედიტ ბანკის" მიერ შეძენილი კოლექცია, ქართველი მხატვრებისა და საზოგადო მოღვაწეების ექსლიბრისებს მოიცავს. ერთ-ერთი მათგანი კი ელენე ახვლედიანის საკუთრებაა.
"ექსლიბრისი წიგნის ბეჭდვასთან ერთად გაჩნდა და საუკუნეების განმავლობაში ის წიგნის განუყოფელი დეტალი იყო, ზოგიერთი მათგანი კი დღესდღეისობით ხელოვნების ნამდვილ ნიმუშად არის აღიარებული. შესაბამისად, პროკრედიტ ბანკისთვის მნიშვნელოვანია აღნიშნულ პროექტში ჩართულობა და მოხარულები ვართ, რომ ქართული ხელნაწერების მემკვიდრეობას ექსლიბრისების ეს უნიკალური კოლექციაც შეემატება" განაცხადა „პროკრედიტ ბანკის" გენერალურმა დირექტორმა დოქტორმა საშა ტერნესმა.
ექსლიბრისების უნიკალური კოლექციის ხელნაწერთა ეროვნული ცენტრისთვის გადაცემის ღონისძიება 17 დეკემბერს, 12:00 საათზე პროკრედიტ ბანკის სათავო ოფისში (ალ. ყაზბეგის 21) გაიმართა.
ექსლიბრისი წიგნის მფლობელის ვინაობის აღმნიშვნელი ერთგვარი ნიშანია, რომელიც წიგნის შიდა ყდაზე ცნობილი მხატვრის ნახატის, გერბის ან რაიმე მოვლენის ამსახველი გამოსახულების სახით დაჰქონდათ, და მასზე წიგნის მფლობელის სახელი და გვარი იყო მითითებული.
