ბაქოში მიმდინარე საერთაშორისო კონფერენციაზე ხელი მოეწერა რეზოლუციას „შაჰ დენიზის" მეორე ფაზის დაფინანსების თაობაზე. კონფერენციაში 10 ქვეყნის ხელმძღვანელ პირებთან ერთად საქართველოს პრემიერ მინისტრი ირაკლი ღარიბაშვილიც მონაწილეობს. საქართველოს დელეგაციაში ასევე შედიან ვიცე -პრემიერები: კახა კალაძე და გიორგი კვირიკაშვილი. კონფერენცია აზერბაიჯანის პრეზიდენტმა ილჰამ ალიევმა გახსნა.
სიტყვით ასევე გამოვიდა საქართველოს პრემიერ მინისტრი ირაკლი ღარიბაშვილი, რომელმაც
"შაჰ-დენიზის" ნავთობსადენის მე-2 ფაზის პროექტის მნიშვნელობაზე ისაუბრა. პროექტის ფარგლებში გათვალისწინებულია სამხრეთ კავკასიური მილსადენის გაფართოება, რათა მოხდეს თურქეთის მიმართულებით წლიურად, დამატებით 16 მლრდ კუბური მეტრი გაზის მიწოდება. დაგეგმილია პარალელური მილსადენის მშენებლობა - 387 კმ აზერბაიჯანის, ხოლო 55 კმ საქართველოს ტერიტორიაზე. ორი დამატებითი საკომპრესორო სადგურის, ახალი წნევის რეგულირებისა და გამზომი სადგურის ინსტალაცია საქართველოში.
შაჰ-დენიზის მე-2 ფაზის ფარგლებში საქართველოში 400-700 მლნ დოლარის ოდენობის ინვესტიციები ჩაიდება. მშენებლობის პიკის პერიოდში ქვეყანაში დაახლოებით 2 000, ხოლო ექსპლუატაციის პერიოდში დაახლოებით 130 ახალი მუდმივი სამუშაო ადგილი შეიქმნება.
გარდა ამისა, საქართველო მილსადენის ექსპლუატაციაში შესვლის შემდეგ, დამატებით ბუნებრივ აირს მიიღებს.
არსებული შეთანხმების თანახმად, საქართველოს შეუძლია ტრანზიტით გატარებული ბუნებრიივი აირი 5% შეღავათიან ფასად შეისყიდოს, რაც გაზსადენის მაქსიმალური დატვირთვის შემთხვევაში წელიწადში დამატებით მილიარდ კუბურ მეტრ გაზზე მეტს შეადგენს. ამასთან, პარალელური მილსადენების მშენებლობისათვის საქართველოს პორტებისა და რკინიგზის გამოყენებით დაახლოებით 350 000 ტონა სამშენებლო ტვირთისა და მასალების გადაზიდვა განხორციელდება.
შაჰ დენიზის საბადო - ყველაზე დიდი საბადოა აზერბაიჯანში, რომელიც კასპიის ზღვაში მდებარეობს. საბადო 1999 წელს აღმოაჩინეს. საბადოს ოპერატორები არიან კომპანიები - BP (25.5%), Statoil (25.5%), SOCAR (10%), Total S.A. (10%), LUKoil (10%), NIOC (10%), TPAO (9%). "შაჰ დენიზის" საბადოს რეზერვი დაახლოებით 1 ტრილიონი კუბური მეტრია. საბადოზე გაზისა და გაზის კონდენსანტის მოპოვება 2006 წელს დაიწყო.
პროექტის ფარგლებში სამხრეთი კავკასიის მილსადენი (SCP) გაფართოვდება ახალი პარალელური მილსადენით, რომლიც აერბაიჯანისა და საქართველოს ტერიტორიებზე გაივლის. თურქეთში შაჰ-დენიზის გაზის ტრანსპორტირება მოხდება ახალი ტრანსანატოლიური მილსადენის (TANAP) მეშვეობით. ევროპაში აიგება ტრანსადრიატიკული მილსადენი (TAP), რომელიც გაზს საბერძნეთისა და ალბანეთის გავლით იტალიას მიაწვდის.
პირველი გაზის გაშვება მილსადენში გამიზნულია 2018 წლისათვის და ის საქართველოსა და თურქეთს მიეწოდება. ერთი წლის შემდეგ კი გაზის ექსპორტი ევროპაშიც განხორციელდება.
