დღეს, სასჯელაღსრულების, პრობაციისა და იურიდიული დახმარების საკითხთა მინისტრმა ხათუნა კალმახელიძემ, ფონდ "ღია საზოგადოება საქართველოს" აღმასრულებელმა დირექტორმა ქეთი ხუციშვილმა და "წამების მსხვერპლთა ფსიქოსოციალური და სამედიცინო რეაბილიტაციის ცენტრის" დირექტორმა ლელა ცისკარიშვილმა თანამშრომლობის მემორანდუმი გააფორმეს. ამის შესახებ სასჯელაღსრულების სამინისტროს პრესსამსახური იუწყება.
"ღია საზოგადოება-საქართველოს" მიერ დაფინანსებული პროექტი მიზნად ისახავს არასრულწლოვანთა აღმზრდელობით დაწესებულებაში სამედიცინო დახმარებისა და მომსახურების ხელმისაწვდომობის კვლევას, რაც არსებულ ხარვეზებს და საჭიროებებს გამოავლენს. კერძოდ, კვლევის შედეგად გამოვლინდება, როგორ არის დაცული მსჯავრდებულების, როგორც პაციენტების უფლებები, რამდენად არის ხელმისაწვდომი მათთვის ჯანდაცვის სერვისები, ადეკვატურია თუ არა სამედიცინო მომსახურების ხარისხი და როგორ არის ორგანიზებული საზოგადოებრივი ჯანდაცვის ეპიდემიოლოგიის და კლინიკური მედიცინის საკითხები. კვლევის დასრულების შემდეგ მომზადდება რეკომენდაციები, რომელიც ხელს შეუწყობს დაწესებულებაში ჯანდაცვის სისტემის გაუმჯობესებას. ", - ნათქვამია სასჯელაღსრულების სამინისტროს პრესსამსახურის განცხადებაში.
ხსენებული მონიტორინგი 6 თვეში დასრულდება.
