აჭარის უმაღლესი საბჭოს წევრი, ფრაქცია „ქართული ოცნება- თავისუფალი დემოკრატების" თავჯდომარე სულხან ღლონტი საქართველოს პარლამენტის ვიცე-სპიკერის მურმან დუმბაძის მიერ კახი კალაძის მისამართით გაკეთებულ განცხადებას ეხმიანება და „ჯი-ეიჩ-ენისთვის" მიცეულ კომენტარში აცხადებს, რომ მურმან დუმბაძემ წარსულის რიტორიკა გამოიყენა
„როგორც მივხვდი, კახი კალაძის განცხადება იყო პარტიის გენერალური მდივნის განცხადება. მათ საკუთარი პარტიის წევრს ავთანდილ ბერიძეს განუმარტეს რომ ასეთი ხარჯების გაღება არ ჯდება მათი პარტიის სტანდარტებში. მე არსად მომისმენია, რომ კალაძემ როგორც ენერგეტიკის მინისტრმა , აჭარის უმაღლესი საბჭოს თავმჯდომარეზე ან უმაღლესის ბიუჯეტის ფორმირებაზე განახორციელა ზეწოლა როგორც ეს მოგვიანებით განაცხადა მურმან დუმბაძემ. არ ვაპირებდი გამოვმხმაურებოდი ამ საკითხს, მაგრამ საპასუხო განცხადებამ, რომელიც მურმანმა გააკეთა დამარწმუნა, რომ ეს აუცილებელი და საჭიროა", - განაცხადა ღლონტმა.
მისივე თქმით, ვიცე-სპიკერის განცხადება, თითქოს საქართველოს ხელისუფლებას კომპეტენციები აერია, და იქვე ავტონომიის სტატუსზე ხაზგასმა მეტი არაფერია თუ არა პოლიტიკურ გავლენაზე მინიშნება.
„რეალურად აჭარაში ეს განწყობა არ არსებობს, მეტიც მოსახლეობა ითხოვს მეტ ჩარევას, მათ სჭირდებათ მეტი ყურადღება და მეტი ხარჯები საქართველოს ცენტრალური ბიუჯეტიდან, რათა საბოლოოდ დაიძლიოს ის მძიმე სოციალური ფონი რომელიც არის რეგიონში", - განაცხადა სულხან ღლონტმა და დასძინა, - „ მურმან დუმბაძემ გამოიყენა წარსულის რიტორიკა, რომელსაც მთელი ოჯახით ებრძოდა დიდი ხანი. ეს არის კატეგორიულად მიუღებელი იდეა, რომელსაც აქვს ბევრი ქვეთავი და რომელიც სახიფათოა.
რიტორიკა რომელიც ყოფს და განსხვავებაზე მიანიშნებს ადამიანებს და არა იმაზე რაც მათ აერთიანებთ. მინდა იცოდეს ყველაm, ვინც ამ თემით გადაწყვიტა წარდგეს თანამედროვე ქართულ პოლიტბაზარზე, რომ ამ ტიპის იდეებს დიდი წინააღმდეგობა შეხვდება და პირველ რიგში ეს წინააღმდეგობა აჭარის უმაღლეს საბჭოში იქნება.
იმედს ვიტოვებ, რომ ეს იყო ემოციურ ფონზე გაკეთებული განცხადება და მას მეტჯერ აღარ მოვისმენთ".