„მე როგორც ამჟამინდელი იუსტიციის მინისტრი ბოდიშს ვუხდი ჩვენს მოქალაქეებს იმ დაშვებული შეცდომების გამო, რომელიც წინა ხელისუფლებამ ჩაიდინა",- აღნიშნული განცხადება იუსტიციის მინისტრმა თეა წულუკიანმა თბილისის იუსტიციის სახლის ირგვილივ განვითარებულ მოვლენებთან დაკავშირებით გააკეთა, რის გამოც მოქალაქეებს სერვისების მიღება თბილისის მასშტაბით სხვადასხვა ადგილზე უწევთ.
როგორც თეა წულუკიანმა მთავრობის სხდომის დასრულების შემდეგ განმარტა, 16 დეკემბერს იუსტიციის სამინისტრო თბილისის იუსტიციის სახლის სახურავის დაზიანებაზე და სამომავლო გეგმებზე განცხადებას გააკეთებს.
„ორშაბათს ჩვენ გავეკეთებთ დეტალურ განცხადებას იმასთან დაკავშირებით, თუ როგორ კეთდებოდა ეს სახურავი და რა გვაქვს მომავალში დაგეგმილი, რომ რაც შეიძლება მალე პრობლემა გამოსწორდეს"- აღნიშნა წულუკიანმა.
მინისტრის თქმით, თბილისის იუსტიციის სახლის დაზიანებულ სახურავთან დაკავშირებით მიმდინარეობს შეფასებითი სამუშაოები.
„დღეს ინფორმაცია მივაწოდეთ საქართველოს მთავრობას. ჩვენ შევქმნით სამუშაო ჯგუფს, რომელშიც იუსტიციის სამინისტროსთან ერთად ჩართული იქნება ინფრასტრუქტურის სამინისტროც. ამ ეტაპზე შეგვიძლია გითხრათ, რომ სახურავის კონსტრუქციის ნაწილს აქვს გარკვეული პრობლემები"- განმარტა წულუკიანმა. მინისტრის განმარტებითვე, მიუხედავად ამისა მოქალაქეებისთვის სერვისის მიწოდება ჩვეულ რეჟიმში ხდება, ისევე როგორც ეხ ხდებოდა თბილისის იუსტიციის სახლში.
„იუსტიციის სამინისტროს ხელმძღვანელების, სიპ-ების ხელმძღვანელებისა და თანამშრომლების 24 საათიანი მუშაობის შედეგად დღეს გვაქვს ასეთი მდგომარეობა: აღსრულების ეროვნულ ბიუროში, ჩუბინაშვილისა და თამარ მეფის გამზირის კვეთაზე ე.წ. „მ2"-ის შენობაში, მეტრო მარჯანიშვილთან საჯარო რეესტრის ყოფილ შენობაში გახსნილის 4 პუნქტი, სადაც საშუალოდ 800 მოქალაქე მიდის დღეში"- განმარტა წულუკიანმა.
