„საქართველოს ახალგაზრდა კონსტიტუციონალისტთა ასოციაცია" ეხმიანება საქართველოს პარლამენტის პლენარულ სხდომაზე განვითარებულ მოვლენებს. ასოციაციის პოზიციით, საქართველოს პარლამენტის, როგორც საკანონმდებლო ორგანოს საქმიანობაში, ქვეყნის წინაშე დღეს-დღეობით მდგარი გამოწვევებისა და კანონშემოქმედებითი პროცესის არასახარბიელო პრაქტიკის ფონზე, მიუღებელია იმ ტიპის ინციდენტები, რომელსაც ადგილი დღეს, 11 დეკემბერს პლენარული სხდომის მიმდინარეობისას ჰქონდა. თითოეულმა დეპუტატმა მკაფიოდ უნდა გააცნობიეროს იმ ნდობის ხარისხი, რომელიც მას ქართველმა ამომრჩეველმა გამოუცხადა. შესაბამისად, ყოველი პარლამენტარი, როგორც ქვეყნის უმაღლესი წარმომადგენლობითი ორგანოს წევრი, მაქსიმალურად მოზომილი უნდა იყოს საჯაროდ როგორც ჟესტიკულაციის, ისე, ლექსიკის გამოყენებისას, რათა თავიდან იქნეს აცილებული პარლამენტის მუშაობის შეფერხება.
იმედს ვიტოვებთ, რომ დღევანდელი ინციდენტი არ გახდება არაჯანსაღი პოლიტიკური სპეკულაციების საგანი და როგორც უმრავლესობა, ისე უმცირესობა გააგრძელებს მუშაობას სახელმწიფოსთვის სტრატეგიული დატვირთვის მქონე კანონპორექტების განხილვა/კენჭისყრაზე, რომელიც პარლამენტის პლენარული სხდომის დღის წესრიგით არის გათვალისწინებული.
მასალის გამოყენების პირობები
