საქართველოს პრემიერ-მინისტრის ირაკლი ღარიბაშვილის განცხადებით, ახალციხის ელექტროგადამცემი ხაზსა და ქვესადგურს უდიდესი მნიშვნელობა აქვს რეგიონის ენერგეტიკული განვითარებისა და ენერგოუსაფრთხოებისათვის. როგორც ღარიბაშვილმა სიტყვით გამოსვლისას განმარტა საქართველოსთვის განსაკუთრებული მნიშვნელობა აქვს შავი ზღვის ელექტროგადამცემი ქსელის პროექტის განხორციელებას.
,,დღეს მნიშვნელოვანი დღეა არა მარტო საქართველოსთვის, არამედ მთელი რეგიონისთვის. დღეს ჩვენ ოფიციალურად ვხსნით ახალციხის ქვესადგურს, რომელიც შავი ზღვის ელექტროგადამცემი ქსელის პროექტის ნაწილია. როგორც იცით, ეს პროექტი უაღრესად მნიშვნელოვანია მთელი ჩვენი რეგიონის ენერგეტიკული განვითარებისა და ენერგოუსაფრთხოებისათვის. ამ პროექტის მნიშვნელობაზე მისი დამფინანსებლების ჩამოთვლაც საკმარისია. პროექტის დაფინანსებაში ევროკავშირთან ერთად ჩართული არიან ისეთი წამყვანი საერთაშორისო საფინანსო ორგანიზაციები, როგორიცაა ევროპის რეკონსტრუქციისა და განვითარების ბანკი, ევროპის საინვესტიციო ბანკი, გერმანიის რეკონსტრუქციის საკრედიტო ბანკი. პროექტის დაფინანსებაში თავისი წვლილი შეაქვს აგრეთვე საქართველოს მთავრობასაც.კარგად მოგეხსენებათ, რომ ენერგოუსაფრთხოება და ენერგოპოლიტიკა დღეს ძალიან აქტუალური და ამავე დროს მწვავე თემებია მთელი მსოფლიოსათვის. დღევანდელ სამყაროში ენერგოდამოუკიდებლობა და ენერგოუსაფრთხოება უმნიშვნელოვანესი ფაქტორია პოლიტიკური და ეკონომიკური თვალსაზრისითაც. ამიტომაცაა, რომ საქართველოსთვის განსაკუთრებული მნიშვნელობა აქვს შავი ზღვის ელექტროგადამცემი ქსელის პროექტის განხორციელებას", _განაცხადა ღარიბაშვილმა.
