საქართველოს საგარეო საქმეთა მინისტრ გრიგოლ ვაშაძის მტკიცებით, ქართული მხარე მიაღწევს საერთაშორისო დოკუმენტებში სიტყვა "ოკუპაციის" დაფიქსირებას.
"რუსეთი ცდილობს შეარყიოს საქართველოს ოკუპირებული რეგიონების სამართლებრივი სტატუსი, თუმცა ამას ჩვენ არ დავუშვებთ. პირველი, რასაც ამის საწინააღმდეგოდ გავაკეთებთ ის იქნება, რომ ვიზრუნებთ, ყველა საერთაშორისო დოკუმენტში დაფიქსირდეს სიტყვა "ოკუპაცია". მართალია, აღნიშნულს ბევრი მუშაობა დასჭირდება, მაგრამ შედეგი აუცილებლად დადგება", - განუცხადა ვაშაძემ ჟურნალისტებს ეუთოს საპარლამენტო ასამბლეის დღეს დაგეგმილ სხდომაზე კომენტირებისას, რომლის ერთ-ერთი მთავარი საკითხი საქართველოც იქნება.
შეგახსენებთ, რომ ქართულ მხარეს სურს ეუთოს საპარლამენტო ასამბლეაზე ქვეყნის ოკუპირებულ ტერიტორიებთან მიმართებაში მორიგი რეზოლუცია იქნას მიღებული, თუმცა რა გადაწყვეტილება იქნება მიღებული ჯერჯერობით უცნობია.
