რუსეთის ფედერაციის პრეზიდენტ დიმიტრი მედვედევის განცხადებით, მოსკოვისა და სოხუმის ურთიერთობის ისტორიაში ახალი ერა დაიწყო. აღნიშნული განცხადება მედვედევმა მას შემდეგ გააკეთა, რაც სეპარატისტული აფხაზეთის რეჟიმთან დღეს რამდენიმე სფეროში თანამშრომლობის შესახებ ხელშეკრულებები გააფორმა.
"დღეს დაიწყო რუსეთ-აფხაზეთის ურთიერთობის ისტორიაში ახალი ერა. ჩვენ მიერ ხელმოწერილი დოკუმენტები ეკონომიკის, ტნასპორტის, მიგრაციისა და თავდაცვის სფეროში თანამშრომლობას გულისხმობს. იმედია, ეკონომიკური ურთიერთობები ამ დოკუმენტის ხელმოწერის შემდეგ უფრო ინტენსიური გახდება, ისევე როგორც პოლიტიკური დიალოგი", - განაცხადა მედვედევმა.
მისი განმარტებით, ამ ყველაფერს ამბობს იმისთვის, რომ კიდევ ერთხელ გახდეს ცხადი - "აფხაზეთთან დიპლომატიური ურთიერთობის დამყარება და მისი აღიარება სერიოზული ნაბიჯია, რომელიც უზრუნველყოფს აფხაზეთის განვითარებას".
თავის მხრივ, მოსკოვში ვიზიტით მყოფმა სეპარატისტთა ლიდერმა სერგეი ბაღაფშმა აღნიშნა, რომ საბუთები, რომელიც სოხუმმა მოსკოვთან დღეს გააფორმა, აფხაზეთს დიდ ვალდებულებას ანიჭებს.
"როგორც დამოუკიდებელმა ქვეყანამ, ახლახან დავიწყეთ არსებობა და ჯერ კიდევ ბევრი გვაქვს სასწავლი. მზად ვართ, გავაკეთოთ ყველაფერი, რათა გავხდეთ საერთაშორისო სამართლის სრულუფლებიანი წევრები", - განმარტა მან.
შეგახსენებთ, რომ რუსეთის ფედერაციასა და აფხაზეთის მარიონეტულ რეჟიმს შორის დღეს გაფორმებულ ხელშეკრულებებს შორის ორი ყველაზე მნიშვნელოვანია. ერთი მოსკოვსა და სოხუმს შორის საჰაერო სივრცის აღდგენას, მეორე კი აფხაზეთის ტერიტორიაზე გაერთიანებული რუსული ბაზის შექმნას გულისხმობს.
