"ქრისტიან-დემოკრატები" ქარელის რაიონის სოფელ დვანის მკვიდრის გატაცებას აპროტესტებენ. პარტიის ლიდერები დღეს შემთხვევის ადგილზე იმყოფებოდნენ და მომხდარის შესახებ ინფორმაცია ადგილობრივი მცხოვრებლებისგან, რეგიონის ხელისუფლების წარმომადგენლებისა და ქართველი სამხედროებისგან მიიღეს.
"როგორც ირკვევა, სოსო ხეთაგური საკუთარ საკარმიდამო ნაკვეთში მუშაობდა, როცა რუსმა სამხედროებმა დააკავეს და წაიყვანეს. სოფელში, რომელიც ოკუპირებულ ტერიტორიას ესაზღვრება, ინციდენტებისგან დაზღვეული არავინაა, თუმცა ფაქტია, რომ ეს შემთხვევა სასწრაფო რეაგირებას მოითხოვს. ამ საკითხზე აუცილებლად მექნება საუბარი ხვალ შეერთებული შტატების სახელმწიფო მდივნის პირველ თანაშემწესთან უილიამ ბერნსთან შეხვედრისას" - განაცხადა გიორგი თარგამაძემ.
