დევნილი მოსახლეობის საარსებო პირობების გასაუმჯობესებლად რეგიონებში ბიზნესპროექტების განხორციელება გრძელდება. ამჯერად, ქუთაისში, კოპიტნარის დევნილთა ჩასახლებაში რძის გადამამუშავებელი საწარმო გაიხსნა.
საწარმო გაიხსნა და პროექტი განხორციელდა ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს მხარდაჭერითა და ამერიკის სახელმწიფო დეპარტამენტის დაფინანსებით. პროექტის - "აფხაზეთიდან დევნილთა საარსებო პირობების გაუმჯობესება" შემსრულებელია საქართველოში გაეროს ლტოლვილთა უმაღლესი კომისარიატის ოფისი „ამქორი საქართველო"-სთან ერთად.
„რძის საწარმო დღეში 100-120 კილოგრამი ყველის წარმოება შეუძლია. დასაქმებულია 20-მდე ადამიანი, რაც იმას ნიშნავს რომ კოპიტნარის დევნილთა დასახლებაში დევნილებს შემოსავლის წყარო გააჩნიათ. შემოსავალი გაუჩნდებათ იმათაც, ვინც საქონელს იყოლიებს და რძეს ჩააბარებს. ამ დასახლებაში ეს არის პირველი ბიზნესპროექტი „პირველი მერცხალი" და იმედი მაქვს, შემოსავლის მომტანი პროექტები დევნილთა სხვა ჩასახლებებშიც გაგრძელდება" აღნიშნა მინისტრმა კობა სუბელიანმა
ამ ეტაპზე რძის გადამამუშავებელი საწარმო რამდენიმე სახის რძის პროდუქტს აწარმოებს - დაამზადებს სულგუნს, შებოლილ სულგუნს, დაწნულ სულგუნს, გადახვეულ სულგუნსა და ნადუღს. საწარმოს შეუძლია დღეში 2 ტონა რძე მიიღოს, იქვე მოქმედებს თანამედროვე ტექნოლოგიებით აღჭურვილი ლაბორატორია, რომელიც, როგორც რძეს, ისე რძის პროდუქციას ამოწმებს. ადგილზე ხდება ბაქტერიზაციაც. პროექტი დევნილ მოსახლეობას შესაძლებლობას აძლევს, საარსებო პირობები გაიუმჯობესონ. საწარმოში მთლიანად დევნილები არიან დასაქმებულები. მსგავსი, დევნილებისთვის შემოსავლის მომტანი პროექტები იმერეთის გარდა, სხვა რეგიონებშიც გაგრძელდება.
საწარმოს გახსნას დევნილებთან ერთად დაესწრო მინისტრი კობა სუბელიანი, ქუთაისის მერი, გაეროს ლტოლვილთა უმაღლესი კომისარიატის, ამერიკის სახელმწიფო დეპარტამენტის განსახლების, ლტოლვილთა და მიგრაციის ბიუროს, ამერიკის საელჩოსა და ამქორი-საქართველოს წარმომადგენლები.
