პენტაგონის წარმომადგენლებმა ბოლო კვირების განმავლობაში ნატო-ს რამდენიმე ქვეყანას სთხოვეს, რუსეთისგან მომდინარე საფრთხეზე საჯარო განცხადებებში რიტორიკა შეარბილონ. ამის შესახებ ოთხ ინფორმირებულ წყაროზე დაყრდნობით Reuters წერს.
სააგენტოს წყაროების ცნობით, ამერიკელმა წარმომადგენლებმა ეს თხოვნა იმით ახსნეს, რომ ევროპელი ლიდერებისა და ოფიციალური პირების ზოგიერთი განცხადება კონტინენტის უსაფრთხოებას აზიანებს.
რიტორიკის შერბილებისკენ მოწოდება, სავარაუდოდ, ლიეტუვას, ლატვიასა და ესტონეთს შეეხო. ამასთან, უცნობია, გადაეცა თუ არა მსგავსი გზავნილები ორმხრივი შეხვედრების დროს ევროპის სხვა ქვეყნების მთავრობებსაც.
ერთ-ერთი წყაროს თქმით, ამერიკელი ოფიციალური პირების ყურადღება მიიპყრო ევროპელი ლიდერების განცხადებებმა, რომ რუსეთი გამოუვალ მდგომარეობაში აღმოჩნდა და უკრაინაში შეჭრის შენელების ფონზე სულ უფრო სასოწარკვეთილ ნაბიჯებს მიმართავს.
ერთ-ერთი ამერიკელი მაღალჩინოსანი, რომელმაც ეს გზავნილი ევროპელ კოლეგებს გადასცა, პენტაგონის პოლიტიკის მიმართულების ხელმძღვანელი ელბრიჯ კოლბი იყო. ის ევროპაში ამერიკული სამხედრო კონტინგენტის რაოდენობის მიმდინარე გადახედვის პროცესში ერთ-ერთი საკვანძო ფიგურაა.
წყაროების განცხადებით, ამერიკელი მაღალჩინოსნები ევროპელების განცხადებებს შორის განსაკუთრებით გამოარჩევდნენ შეფასებებს, რომ რუსეთი „ვირთხასავით კუთხეშია მომწყვდეული“. ერთ-ერთი წყაროს ინფორმაციით, კოლბიმ ბალტიისპირეთის ერთ-ერთ წარმომადგენელს უთხრა, რომ რუსების „გამოწვევა“ საჭირო არ არის.
კიდევ ერთი წყაროს ცნობით, პენტაგონმა ცოტა ხნის წინ გამართულ ცალკე შეხვედრაზე ესტონეთის დელეგაციას საჯარო განცხადებებში „თავშეკავებისკენ“ მოუწოდა.
ევროპელი მაღალჩინოსნის თქმით, პენტაგონის რჩევები მეგობრული ტონით იყო გადმოცემული, თუმცა მათ ევროპელების გაკვირვება გამოიწვია. ამასთან, არცერთ წყაროს არ უთქვამს, რომ ამერიკელების მოწოდებები დაპირისპირების ფორმით იყო გაკეთებული.
Reuters-მა ინფორმაციის კომენტირებისთვის პენტაგონს მიმართა. უწყების წარმომადგენელმა განაცხადა: „მოკავშირეებს შორის პირადი საუბრები პირად საუბრად რჩება, ამიტომ ამ მტკიცებებს კომენტარს არ გავუკეთებთ“.
