საპარლამენტო უმრავლესობის წევრი აკაკი მინაშვილი დარწმუნებულია, რომ ოპოზიცია "სხვის ტრაგედიას საკუთარი პოლიტიკური მიზნებისთვის იყენებს" და ამის გამო საგამოძიებო კომისიის შექმნა არ შეიძლება. ამის შესახებ განცხადება აკაკი მინაშვილმა დღეს სესიაზე მას შემდეგ გააკეთა რაც ქრისტიან-დემოკრატებმა გახმაურებულ მკვლელობებთან დაკავშირებით საგამოძიებო კომისიის შექმნა მოითხოვეს.
როგორც აკაკი მინაშვილმა განაცხადა, თუ "ქრისტიან-დემოკრატებს რეალური სურვილი აქვთ რაიმე იქნას გამოძიებული, მაშინ ისინი ჯერ აჭარაში არსებულ დარღვევებზე და ბადრი პატარკაციშვილის ფინანსური მახინაციების გამოძიებას მოითხოვდნენ.
რაც შეეხება "ქრისტიან-დემოკრატების" მიერ მოთხოვნილ საგამოძიებო კომისიის შექმნას გახმაურებულ მკვლელობებთან დაკავშირებით, მინაშვილი დარწმუნებულია, რომ ეს საკითხი უკვე გამოძიებულია "ყველა დამნაშავე ადეკვატურად არის დასჯილი" და "ქრისტიან-დემოკრატების" ამ მოთხოვნის შესრულებას აზრიც არ აქვს.
"როდესაც ვლაპარაკობთ სამართლიანობაზე, მინდა შეგახსენოთ, რომ ეს არის ხელისუფლება, რომელიც არ ერიდება სიმართლის დადგენას და თუ იყო საკუთარი პარტიის მიერ წარმომადგენლების მიერ კრიმინალი ჩადენილი ყველა ასეთი საქმე ბოლომდე მიიყვანა", - განაცხადა მინაშვილმა და დასძინა, რომ ეს არის ის სამართლიანობა, რომელიც "არ არასებობდა 2003 წლამდე და ეს არის იმის ნიშანი, რომ საქართველოს სახელმწიფო სახელმწიფოდ ჩამოყალიბდა".
