უკრაინის პრეზიდენტმა ვოლოდიმირ ზელენსკიმ განაცხადა, რომ სექტემბრის ბოლოს ამერიკულ დელეგაციასთან შეხვედრას ელოდება, რომელზეც უკრაინა ენერგეტიკული და სასურსათო უსაფრთხოების საკითხებს დააყენებს.
ამის შესახებ ზელენსკიმ ჟურნალისტებთან საუბრისას, კანადის პრემიერ-მინისტრ მარკ კარნისთან შეხვედრის შემდეგ განაცხადა.
ზელენსკის თქმით, რუსეთის წინასაარჩევნო კამპანიის პერიოდში მოსკოვთან სერიოზულ მოლაპარაკებებს არ ელოდება, თუმცა იმედოვნებს, რომ სექტემბრის ბოლოს, ნიუ-იორკში, გაერო-ს გენერალური ასამბლეის ფარგლებში, ამერიკულ მხარესთან შეხვედრა შედეგიანი იქნება.
მისივე განცხადებით, კიევი აშშ-ის დელეგაციასთან ყოველდღიურად ინარჩუნებს კავშირს, ხოლო მთავარი საკითხებია ენერგეტიკული და სასურსათო უსაფრთხოება.
„როდესაც ვსაუბრობთ იმაზე, თუ რა შედეგების მიღწევა შეგვიძლია, როგორ მოვემზადოთ სამმხრივი შეხვედრისთვის და რა შედეგები შეიძლება მოჰყვეს მას, ყველა პარტნიორი მსოფლიოში, რა თქმა უნდა, აყენებს მარცვლეულისა და სოფლის მეურნეობის პროდუქციის საკითხს, რომლის ექსპორტის დაბლოკვაც რუსეთმა შავ ზღვაში დაიწყო. ჩვენ ვუპასუხეთ და ანალოგიური ზომები მივიღეთ. მაგრამ რეაგირება აუცილებელია, წინააღმდეგ შემთხვევაში რუსეთი ამ ომს არასოდეს შეწყვეტს“, - განაცხადა ზელენსკიმ.
უკრაინის პრეზიდენტი ნიუ-იორკში აშშ-ის პრეზიდენტ დონალდ ტრამპთან შესაძლო შეხვედრის შემდეგ კონკრეტულ შედეგებს ელოდება.
ამასთან, ზელენსკიმ აღნიშნა, რომ ამ პერიოდში რუსეთმა შესაძლოა უკრაინაზე თავდასხმები გააძლიეროს.
„ვიცნობთ რა რუსეთს, როცა იგებენ, რომ ევროპელებთან, კანადელებთან ან ამერიკელებთან მოლაპარაკებებს ვაწარმოებთ, ცდილობენ, ჩვენზე თავდასხმები გააძლიერონ. ამას მხოლოდ ერთი მიზანი აქვს - ჩაშალონ ნებისმიერი მოლაპარაკება და ნებისმიერი დიალოგი. თუმცა ჩვენ ამის გვჯერა და ამ მიმართულებით სვლას გავაგრძელებთ - ეს ომის შეჩერების ერთადერთი გზაა. სხვა გზა არ არსებობს“, - აღნიშნა უკრაინის პრეზიდენტმა.
