თბილისი რუსული ავიაკომპანიების მიერ აფხაზეთში ფრენების შეწყვეტას არ მოელის.
როგორც " ICAO "-ს ეგიდით პარიზში დღეს დაგეგმილ შეხვედრაზე კომენტირებისას ჟურნალისტებს რეინტეგრაციის საკითხებში სახელმწიფო მინისტრმა თემურ იაკობაშვილმა განუცხადა, ამ საკითხს ქართული მხარე რეალისტურად უყურებს.
"ჩვენ რეალისტები ვართ და არ ველოდებით, რომ კონკრეტულად რუსეთის მიმართ სანქციები დაწესდება და რუსული ავიაკომპანიები აფხაზეთში ფრენებს შეწყვეტენ", - განაცხადა იაკობაშვილმა.
მისივე განმარტებით, აღნიშნულის მიუხედავად, ქართული მხარე აბსოლუტურად სამართლიანად მოითხოვს, რომ არცერთმა ქვეყანამ და არცერთმა ავიაკომპანიამ აფხაზეთის აეროპორტი არ გამოიყენოს.
შეგახსენებთ, რომ დღეს საქართველოს საჰაერონავიგაციის სამეთვალყურეო საბჭოს თავმჯდომარე გიორგი კარბელაშვილი " ICAO "-ს ეგიდით მოწყობილ შეხვედრაზე პარიზში სიტყვით გამოვა.
მოხსენების დროს კარბელაშვილი აქცენტს გააკეთებს საერთაშორისო კონვენციის შესრულების აუცილებლობაზე, რომლის მიხედვითაც არცერთ ქვეყანას არ აქვს უფლება, მეორე სახელმწიფოს საჰაერო სივრცე მისი ნებართვის გარეშე გადაკვეთოს.
"შევძელით შეგვეტანა ერთ-ერთ პუნქტად დღევანდელ შეხვედრაზე არსებული სიტუაცია აფხაზეთში. ჩვენ ვითხოვთ, რომ არცერთმა ქვეყანამ, არცერთმა კომპანიამ არ გამოიყენოს აფხაზეთის აეროპორტი. ის კომპანია, რომელიც გამოიყენებს აეროპორტს, სადაც უსაფრთხოების არანაირი ნორმა არ არის დაცული, ის კომპანია სისხლის სამართლებრივად აგებს პასუხს, რაშიც იკაო დაგვეხმარება", _ განაცხადა გიორგი კარბელაშვილმა.
