The Hill-ის ინფორმაციით, უკრაინის პრეზიდენტ ვოლოდიმირ ზელენსკისთან შეხვედრაზე აშშ-ის სენატის 100-ვე წევრია მიწვეული. შეხვედრა იმ ფონზე გაიმართება, როდესაც სენატი რუსეთის წინააღმდეგ სანქციების შესახებ კანონპროექტს განიხილავს.
გამოცემის ცნობით, შეხვედრა სამშაბათს ადგილობრივი დროით 18:00 საათზე (თბილისსი დროით ოთხშაბათის 02:00 საათზე) აშშ-ის კაპიტოლიუმში გაიმართება.
შეხვედრა იმ დროს ტარდება, როდესაც სენატი განიხილავს კანონპროექტს, რომელიც რუსეთისა და მისი სავაჭრო პარტნიორების წინააღმდეგ უფრო მკაცრი სანქციების დაწესებას ითვალისწინებს, როგორც პასუხს მოსკოვის მიერ უკრაინის წინააღმდეგ მიმდინარე აგრესიაზე.
ზელენსკი ვაშინგტონში სენატორ ლინდსი გრემის დაკრძალვაზე დასასწრებად იმყოფება. გრემი სანქციების შესახებ კანონპროექტის ერთ-ერთი ავტორი და კონგრესში უკრაინის მხარდაჭერის ერთ-ერთი მთავარი ფიგურა იყო. მისი ერთ-ერთი ბოლო შეხვედრა 10 ივლისს კიევში სწორედ ზელენსკისთან შედგა.
ფართო ორპარტიული მხარდაჭერის მქონე აღნიშნული კანონპროექტი, სავარაუდოდ, ზელენსკისა და სენატორების შეხვედრის ერთ-ერთი მთავარი განსახილველი თემა იქნება.
ამასთან, აშშ-ის პრეზიდენტმა დონალდ ტრამპმაც მხარი დაუჭირა სანქციების კანონპროექტს და გამოთქვა სურვილი, რომ მასში ირანისა და ახლო აღმოსავლეთში მოქმედი „ჰეზბოლას“ წინააღმდეგ სანქციების გაფართოებაც შევიდეს.
The Hill-ის ცნობით, ბოლო რამდენიმე თვის განმავლობაში აშშ-ის სენატორების ჯგუფები უკრაინის პრეზიდენტ ვოლოდიმირ ზელენსკის რეგულარულად ხვდებოდნენ, რათა კიევისთვის დახმარებისა და რუსეთის წინააღმდეგ დამატებითი სანქციების დაწესების საკითხები განეხილათ.
თებერვალში, მიუნხენში, ზელენსკი ორივე პარტიის წარმომადგენელი სენატორების მრავალრიცხოვან ჯგუფს შეხვდა. რამდენიმე სენატორმა კი მასთან ვაშინგტონში წინა ვიზიტების დროსაც გამართა შეხვედრები.
ამასთან, სამშაბათს დაგეგმილია ვოლოდიმირ ზელენსკისა და აშშ-ის პრეზიდენტ დონალდ ტრამპის შეხვედრაც.
