სამივე მედიასაშუალება რეალურად დამოუკიდებელი რომ იყოს, მაშინ მათი მხარდამჭერი პოზიცია გვექნებოდა, მაგრამ, სამწუხაროდ, ეს მედიები პარტიული ტელევიზიები, პარტიული მედიები არიან და ხელისუფლების პროპაგანდას ემსახურებიან, – ამის შესახებ  პარტიის „გახარია საქართველოსთვის“ წევრმა, დეპუტატმა გიორგი შარაშიძემ საქართველოს პირველ არხს განუცხადა.

შარაშიძეს კითხვა დაუსვეს ევროპარლამენტის გადაწყვეტილებაზე ტელეკომპანია „იმედისთვის“, „რუსთავი 2“-ისა და „პოსტივისთვის“ ერთი წლით აკრედიტაციის შეჩერების თაობაზე.

„სიმართლე არ არის, როცა „ოცნება“ ამბობს, რომ ევროპარლამენტის გადაწყვეტილება ცუდია და თავისუფალი მედიის საქმიანობას ზღუდავს. ეს ტელევიზიები სიმართლეს არ ემსახურებიან და დეზინფორმაციას ავრცელებენ, მით უფრო, რაც საქართველოს ევროპულ მომავალს ეხება. თავისუფალ მედიაზეა როცა არის საუბარი, ნებისმიერი შეზღუდვა მიუღებელია, მაგრამ ამ ტელევიზიებზე როცა ვსაუბრობთ, ისინი ტყუილებს, დეზინფორმაციას ავრცელებენ. ჯერ თავად გახდნენ თავისუფლები, დამოუკიდებლები და მოემსახურონ სიმართლეს. ზოგადად, მედიაში არავინ უნდა ჩაერიოს, რადგან ხელშეუხებელია“, – განაცხადა გიორგი შარაშიძემ.