ევროკომისიის პრეზიდენტმა ურსულა ფონ დერ ლაიენმა განაცხადა, რომ მოლაპარაკების მაგიდასთან დასხდომის დროა, რათა ირანში სამხედრო მოქმედებები შეწყდეს. ამის შესახებ CNN იუწყება.
„ენერგომომარაგების კუთხით მსოფლიო მასშტაბით სიტუაცია კრიტიკულია. ჩვენ ყველანი ვგრძნობთ ამის გავლენას გაზისა და ნავთობის ფასებზე, ჩვენს ბიზნესებსა და თემებზე. უაღრესად მნიშვნელოვანია, რომ მივაღწიოთ მოლაპარაკებების გზით გადაწყვეტას, რომელიც დაასრულებს ახლო აღმოსავლეთში მიმდინარე საომარ მოქმედებებს,“, - განაცხადა ურსულა ფონ დერ ლაიენმა.
გარდა ამისა, ფონ დერ ლაიენმა აღნიშნა, რომ ირანის თავდასხმები სამოქალაქო ინფრასტრუქტურასა და გემებზე სპარსეთის ყურეში მიუღებელია.
შეგახსნებთ, აშშ-ის პრეზიდენტმა დონალდ ტრამპმა განაცხადა, რომ თეირანთან „პროდუქტიული“ მოლაპარაკებების შემდეგ, მან სამხედროებს ხუთი დღით ირანის ელექტროსადგურებსა და ენერგეტიკულ ინფრასტრუქტურაზე თავდასხმების შეჩერება უბრძანა.
