აშშ-ის პრეზიდენტის წარმომადგენელმა სტივ უიტკოფმა შაბათს ფლორიდაში უკრაინულ და ამერიკულ დელეგაციებს შორის გამართულ შეხვედრას კონსტრუქციული უწოდა, რომლის მთავარი აქცენტი „გადაუჭრელი საკითხების წრის შევიწროება“ იყო.
ამის შესახებ უიტკოფი Х-ზე წერს.
„ამერიკის შეერთებული შტატებისა და უკრაინის დელეგაციებმა დღეს ფლორიდაში კონსტრუქციული შეხვედრა გამართეს, როგორც მიმდინარე შუამავლობის ძალისხმევის ნაწილი; დისკუსიები ფოკუსირებული იყო გადაუჭრელი საკითხების შემცირებასა და მოგვარებაზე, რათა მივუახლოვდეთ ყოვლისმომცველ სამშვიდობო შეთანხმებას,“ - წერს უიტკოფი.
უიტკოფმა აღნიშნა, რომ შეერთებული შტატები მიესალმება გადაუჭრელი საკითხების გადაჭრის მცდელობებს, „აღიარებს მათ მნიშვნელობას გლობალური სტაბილურობისთვის“.
უკრაინის დელეგაციის ხელმძღვანელმა, ეროვნული უსაფრთხოებისა და თავდაცვის საბჭოს მდივანმა, რუსტემ უმეროვმა განაცხადა, რომ ფლორიდაში უკრაინისა და აშშ-ის წარმომადგენლები მოლაპარაკებების პროცესში შემდგომი ნაბიჯების განხილვას განაგრძობენ.
