ისლანდიის საგარეო საქმეთა მინისტრმა თორგერდურ კატრინ გუნარსდოტირმა განაცხადა, რომ ოპტიმისტურად არის განწყობილი მისი ქვეყნის ევროკავშირში 2028 წლისთვის გაწევრიანების შესაძლებლობასთან დაკავშირებით. ამის შესახებ მან სააგენტო Reuters-ს განუცხადა.
გუნარსდოტირის თქმით, მოლაპარაკებების დროს ყველაზე რთული საკითხები თევზჭერა და სოფლის მეურნეობა იქნება.
ისლანდიას წარსულში ევროკავშირთან უთანხმოება ჰქონდა თევზჭერის კვოტებთან დაკავშირებით, რაც მისი ეკონომიკის ერთ-ერთ მთავარ მამოძრავებელ ძალაზე ახდენს გავლენას.
მან ასევე განაცხადა, რომ ნებისმიერი ახალი მოლაპარაკებები თავიდანვე უნდა იყოს ფოკუსირებული ყველაზე რთულ საკითხებზე, როგორიცაა თევზჭერა, სოფლის მეურნეობა და შრომის ბაზარი.
„თუ ამას გავაკეთებთ, მაშინ საკმაოდ ოპტიმისტურად ვარ განწყობილი, რომ 2028 წლის ბოლოსთვის ევროკავშირის წევრი გავხდებით“, - თქვა მან.
