ავღანეთმა პაკისტანი ორშაბათს გვიან ღამით ქაბულში ნარკოლოგიურ სარეაბილიტაციო კლინიკაზე საჰაერო თავდასხმის შედეგად სულ მცირე 400 ადამიანის მკვლელობაში დაადანაშაულა, რასაც პაკისტანი უარყოფს. ინფორმაციას Associated Press ავრცელებს.
„ეს გასული თვის ბოლოს დაწყებული კონფლიქტის მკვეთრ ესკალაციაზე მიუთითებს, რომელიც ავღანეთში მუდმივი სასაზღვრო შეტაკებებისა და საჰაერო თავდასხმების შედეგია. ცეცხლის შეწყვეტის შესახებ საერთაშორისო მოწოდებები ყურადღების მიღმა დარჩა,“ - წერს გამოცემა
პაკისტანმა უარყო საავადმყოფოზე თავდასხმა და განაცხადა, რომ მისი დარტყმების შედეგად, რომლებიც მოიცავდა აღმოსავლეთ ავღანეთში განხორციელებულ თავდასხმებს, არცერთი მშვიდობიანი მოქალაქე არ დაღუპულა.
ავღანეთის მთავრობის წარმომადგენელმა, ჰამდულა ფითრატმა განაცხადა, რომ საჰაერო დარტყმა ქაბულში მდებარე საავადმყოფოზე ადგილობრივი დროით დაახლოებით საღამოს 9 საათზე განხორციელდა და 2000 საწოლიანი დაწესებულების დიდი ნაწილი გაანადგურა.
მან აღნიშნა, რომ დაღუპულთა რიცხვმა 400-ს მიაღწია, ხოლო დაშავებულთა რაოდენობა დაახლოებით 250-ს შეადგენს.
AP-ის ცნობით, ადგილობრივმა ტელევიზიებმა გაავრცელეს ვიდეო, რომელშიც ჩანს მაშველებს ფანრების გამოყენებით როგორ გადაჰყავთ დაშავებულები და მეხანძრეები, რომლებიც შენობის ნანგრევებში ხანძრის ჩაქრობას ცდილობენ.
პაკისტანის პრემიერ-მინისტრის პრესსპიკერმა, მოშარაფ ზაიდიმ, ბრალდებებს უსაფუძვლო უწოდა და განაცხადა, რომ ქაბულში არცერთი საავადმყოფო მათი სამიზნე არ ყოფილა.
პაკისტანის ინფორმაციის მინისტრმა ათაულა ტარარმა სამშაბათს დილით სოციალურ ქსელში გამოაქვეყნა ინფორმაცია, რომ პაკისტანის ძალებმა „ზუსტი საჰაერო დარტყმები“ განახორციელეს ქაბულსა და ნანგარჰარის აღმოსავლეთ პროვინციაში სამხედრო ობიექტებზე.
მისი თქმით, ქაბულში ორ ლოკაციაზე „ტექნიკური მხარდაჭერის ინფრასტრუქტურა და საბრძოლო მასალის საწყობები“ განადგურდა.
ორ ქვეყანას შორის კონფლიქტი ბოლო კვირებში გამწვავდა, მას შემდეგ, რაც პაკისტანმა ავღანეთში საჰაერო დარტყმები დაიწყო.
ისლამაბადი „თალიბანს“ ადანაშაულებს Tehrik-e-Taliban Pakistan-ისა და მისი შვილობილი ორგანიზაციების, ასევე „ისლამური სახელმწიფოს“ მებრძოლების მფარველობაში, რომლებიც მათი განცახდებით, პაკისტანის ტერიტორიაზე ტერორისტულ თავდასხმებს ახორციელებენ.
ავღანეთი უარყოფს ბრალდებებს და პაკისტანის ქმედებებს მისი სუვერენიტეტის დარღვევად მიიჩნევს. მანამდე, ქაბულმა საერთო საზღვრის გასწვრივ საპასუხო ოპერაციების დაწყების შესახებ განაცხადა.
