ევროკავშირის საბჭომ დამატებითი სანქციები დააწესა ირანის წინააღმდეგ. კერძოდ იმ ფიზიკური და იურიდიული პირების მიმართ, რომლებიც ქვეყანაში ადამიანის უფლებების დარღვევაზე არიან პასუხისმგებელი.
ახალი სანქციები 16 ფიზიკურ და სამ ორგანიზაციას ეხება, რომლებმაც გადამწყვეტი როლი ითამაშეს 2026 წლის იანვარში ანტისამთავრობო საპროტესტო აქციების ჩახშობაში, რასაც ათასობით მშვიდობიანი მოქალაქის სიცოცხლე შეეწირა.
ევროკავშირის საბჭომ შემზღუდველი ზომები დააწესა ირანის შინაგან საქმეთა მინისტრის მოადგილის, უსაფრთხოებისა და სამართალდამცავი საკითხებში, ასევე ისლამური რევოლუციის გუშაგთა კორპუსის (IRGC) ადგილობრივი მეთაურების მიმართ, რომლებიც უშუალოდ არიან ჩართულნი საპროტესტო აქციების სასტიკ ჩახშობაში.
სანქცირებულთა სიაში ასევე შედიან ირანის სასამართლო სისტემის წევრები, რომლებიც მონაწილეობდნენ მშვიდობიანი მომიტინგეებისა და აქტივისტების დევნაში.
სიაში შეტანილია „ციხეების, უსაფრთხოებისა და საგანმანათლებლო მოქმედების ორგანიზაციის“ ხელმძღვანელი, რომლის ხელმძღვანელობითაც ირანის ციხეებში წამებისა და არასათანადო მოპყრობის სხვა ფორმების შემთხვევები დაფიქსირდა.
გარდა ამისა, საბჭომ სანქცირებულთა სიაში შეიყვანა მოჰამედ რასულულას კორპუსი, რომელიც პასუხისმგებელია თეირანში ისლამური რევიოლუციისგუშაგთა კორპუსის ძალების კოორდინაციაზე, ასევე იმამ რეზას ისლამური რევოლუციის გვარდიის კორპუსი, რომელიც წარმოადგენს ისლამური რევიოლუციის გუშაგთა კორპუსის ადგილობრივ ფილიალს ხორასან რაზავის პროვინციაში, სადაც საპროტესტო აქციების ჩახშობა განსაკუთრებით სასტიკი იყო.
ირანში ადამიანის უფლებების მძიმე დარღვევებთან დაკავშირებით ამ დროისთვის სანქციები უკვე დაუწესდა 263 ფიზიკურ და 53 იურიდიულ პირს.
სანქცირებულ პირებსა და ორგანიზაციებს აქტივები ეყინებათ, ამასთან, ევროკავშირის მოქალაქეებსა და კომპანიებს ეკრძალებათ მათთვის ფინანსური რესურსების გადაცემა. ფიზიკური პირებისთვის ასევე მოქმედებს სავიზო შეზღუდვა, რაც ნიშნავს, რომ მათ ეკრძალებათ ევროკავშირის ტერიტორიაზე შესვლა ან მისი გავლით გადაადგილება.
