უკრაინის პრეზიდენტმა ვოლოდიმირ ზელენსკიმ უნგრეთის პრემიერ-მინისტრ ვიქტორ ორბანის ქმედებები რუსეთის პრეზიდენტ ვლადიმირ პუტინის პოლიტიკას შეადარა.
როგორც უკრაინის ლიდერმა Politico-სთან ინტერვიუში განაცხადა, პუტინსა და ორბანს შორის მხოლოდ ერთი განსხვავებაა: ეს უკანასკნელი უკრაინის წინააღმდეგ ჯერ არ იყენებს დრონებს ან ჯარს, მაგრამ მხარდაჭერას ბლოკავს.
ზელენსკიმ აღნიშნა, რომ ორბანი რუსეთის სრულმასშტაბიანი შეჭრის დაწყებიდან ბლოკავს მოსკოვის წინააღმდეგ ყველა სანქციას, რაც ხელს უშლის იარაღის ტრანზიტს უნგრეთის გავლით და უკრაინისთვის სამხედრო დახმარების გაწევას.
„ის ბლოკავს თანხას, ბლოკავს იარაღს, ბლოკავს ჩვენს გზას ევროკავშირისკენ, ჩვენს ცხოვრების წესს. ის ასევე ავრცელებს რუსულ ნარატივებს“, - თქვა უკრაინის პრეზიდენტმა.
დამატებით შეკითხვაზე, არის თუ არა ორბანი პუტინის მოკავშირე, ზელენსკიმ უპასუხა:
„დიახ, რა თქმა უნდა. ის რუსეთის ლიდერის მხარესაა. ის იგივეს აკეთებს - ყველაფერს ბლოკავს უკრაინისთვის. ერთადერთი, რასაც ის დღეს არ აკეთებს, არის ჩვენს ტერიტორიაზე რაკეტებით ან დრონებით თავდასხმა და თავისი ჯარისკაცების გამოგზავნა.“
