8 მარტს, დილით, ლიბანის დედაქალაქ ბეირუთში, სასტუმრო Ramada-ზე ისრაელის საჰაერო დარტყმის შედეგად ოთხი ადამიანი დაიღუპა და 10 დაშავდა. ამის შესახებ Reuters ლიბანის ჯანდაცვის სამინისტროსა და ისრაელის თავდაცვის ძალებზე დაყრდნობით იუწყება.
ისრაელის სარდლობამ განაცხადა, რომ თავდასხმის სამიზნე ისლამური რევოლუციის გუშაგთა კორპუსის ელიტური ფრთის - „ყუდსის ძალების“ ძირითადი მეთაურები იყვნენ, რომლებიც ლიბანის დედაქალაქში მოქმედებდნენ.
„ლიბანის „ყუდსის ძალების“ მეთაურები ისრაელის სახელმწიფოსა და მისი მოქალაქეების წინააღმდეგ ტერორისტული თავდასხმების ორგანიზებას ცდილობდნენ და ამავდროულად ისლამური რევოლუციის გუშაგთა კორპუსის სახელით მოქმედებდნენ“, - განაცხადა ისრაელის თავდაცვის ძალებში.
Reuters-ის ცნობით, სასტუმროში სამხრეთ ლიბანიდან და ბეირუთის სამხრეთ გარეუბნებიდან ომს გამოქცეული იძულებით გადაადგილებული პირები ცხოვრობდნენ. თავდასხმის შემდეგ, ზოგიერთმა ადამიანმა შენობა სასწრაფოდ დატოვა შემდგომი დაბომბვის შიშის გამო.
