მექსიკის შეიარაღებული ძალების სპეცოპერაციის შედეგად, ქვეყნის ერთ-ერთი უდიდესი ნარკოკარტელის ლიდერი ნემესიო ოსეგუერა სერვანტესი [„ელ-მენჩო“] მოკლეს. ამის შესახებ მექსიკის მთავრობამ განაცხადა.
როგორც გამოწემა The New York Times წერს, მრავალი წლის განმავლობაში „ელ მენჩო“ ხელმძღვანელობდა „ხალისკოს ახალი თაობის“ (CJNG) კარტელს და მოიპოვა ქვეყნის ერთ-ერთი ყველაზე სასტიკი დამნაშავეს რეპუტაცია, რომელსაც არ ეშინოდა სახელმწიფო უსაფრთხოების ძალებთან პირდაპირი დაპირისპირების.
კარტელი შეერთებულ შტატებში ნარკოტიკების (ძირითადად კოკაინის, მეტამფეტამინის და ფენტანილის) გაგზვნაში იყო ჩართული.
The New York Times-ის წყაროების ცნობით, ოსეგუერა მოკლეს ხალისკოს შტატის ქალაქ ტაპალპაში, სადაც მისი ნარკოკარტელი დაარსდა და ბაზირებული იყო.
ვაშინგტონში მექსიკის საელჩომ განაცხადა, რომ სამხედრო ოპერაციის შესახებ დამატებითი ინფორმაცია შეერთებულმა შტატებმა მიაწოდა.
შტატის გუბერნატორმა პაბლო ლემუს ნავარომ სოციალურ ქსელში დაადასტურა, რომ კარტელის წევრებსა და მექსიკის შეიარაღებულ ძალებს შორის შეტაკება მოხდა.
მისი თქმით, უსაფრთხოების ძალების გამოჩენის საპასუხოდ, კარტელთან დაკავშირებულმა უცნობმა პირებმა ოპერაციისთვის ხელის შეშლის მიზნით მანქანების ცეცხლის წაკიდება და გზების გადაკეტვა დაიწყეს.
The New York Times-ის ცნობით, არეულობა მექსიკის სულ მცირე ხუთ შტატში, მათ შორის ხალისკოში, დაიწყო.
ადგილობრივი მაცხოვრებლებისა და რეგიონული ხელისუფლების განცხადებით, არეულობის მონაწილეებმა მანქანები დაწვეს და ქუჩები გადაკეტეს, რაც ნარკოკარტელების გავრცელებული ტაქტიკაა.
ხალისკოს შტატში საგანგებო მდგომარეობა გამოცხადდა. ზოგიერთ რაიონში საზოგადოებრივი ტრანსპორტის მოძრაობა შეჩერებულია და ადგილობრივ მოსახლეობას სახლში დარჩენისკენ მოუწოდებენ. ხანძრის გაჩენის ზოგიერთი შემთხვევა გვადალახარას შტატის დედაქალაქში მოხდა, ქალაქში, რომელიც სულ რამდენიმე თვეში მსოფლიო ჩემპიონატს უმასპინძლებს.
პუერტო ვალიარტასა და გვადალახარას აეროპორტები დროებით დაიკეტა. სოციალურ მედიაში ვრცელდება ვიდეოები, სადაც მგზავრები ტერმინალის შენობებში თავშესაფარს ეძებენ.
აშშ-ის სახელმწიფო მდივნის მოადგილემ, კრისტოფერ ლანდაუმ, „ელ მენჩოს“ ლიკვიდაციას უწოდა „დიდი მოვლენა მექსიკისთვის, შეერთებული შტატებისთვის, ლათინური ამერიკისა და მთელი მსოფლიოსთვის“.
