ალბანეთის დედაქალაქ ტირანაში მთავრობის საწინააღმდეგო საპროტესტო აქცია სამართალდამცავებთან შეტაკებაში გადაიზარდა. ამის შესახებ Reuters იუწყება.
მომიტინგეები ტირანას ცენტრში ედი რამას მთავრობის გადადგომის მოთხოვნით გამოვიდნენ, რითაც გააგრძელეს ალბანეთის ვიცე-პრემიერისა და მისი ახლო მოკავშირის წინააღმდეგ კორუფციის ბრალდებების გამო გამართული საპროტესტო აქციები.
მომიტინგეები პრემიერ-მინისტრის რეზიდენციის მიმართულებით მოლოტოვის კოქტეილებს ისროდნენ და ფეიერვერკებს აფეთქებდნენ, რის შემდეგაც სამართალდამცველებმა მათ წინააღმდეგ ცრემლსადენი გაზი და წყლის ჭავლი გამოიყენეს.
ალბანეთში პოლიტიკური ვითარება დეკემბრის ბოლოდან დაიძაბა, როდესაც ვიცე-პრემიერსა და ინფრასტრუქტურის მინისტრს, ბელინდა ბალუკს, ოფიციალურად დასდეს ბრალი მსხვილი ინფრასტრუქტურული პროექტების ტენდერებში ჩარევასა და გარკვეული კომპანიებისთვის უპირატესობის მინიჭებაში, რასაც თავად უარყოფს.
ანტიკორუფციულმა სასამართლომ ბალუკა თანამდებობიდან გაათავისულა, თუმცა მის მიმართ შემდგომი სამართლებრივი დევნისთვის პარლამენტმა მას იმუნიტეტი უნდა მოუხსნას, თუმცა უნდა აღინიშნოს, რომ ედი რამას პარტიას გასულ წელს არჩევნებში გამარჯვების შემდეგ პარლამენტში დამაჯერებელი უმრავლესობა აქვს.
დეკემბრიდან ტირანაში ანტისამთავრობო საპროტესტო აქციები გამუდმებით იმართება.
