უკრაინა მზადაა შეერთებულ შტატებთან და სხვა პარტნიორებთან კომპრომისებზე იმსჯელოს, თუმცა რუსეთისგან ულტიმატუმებს არ მიიღებს.
ამის შესახებ ვოლოდიმირ ზელენსკიმ Kyodo-სთან ინტერვიუში განაცხადა.
„ჩვენ იქ ვდგავართ, სადაც ვდგავართ - ეს დიდი კომპრომისია. მათ ჩვენი ტერიტორიის თითქმის 20% დაიკავეს. და ჩვენ მზად ვართ ახლავე ვისაუბროთ მშვიდობაზე, „იქ ვდგავართ, სადაც ვდგავართ“ პრინციპის საფუძველზე. ეს დიდი კომპრომისია“, - განაცხადა ზელენსკიმ.
პრეზიდენტის თქმით, უკრაინა მზადაა „რეალური კომპრომისებისთვის“, მაგრამ არა „კომპრომისებისთვის ჩვენი დამოუკიდებლობისა და სუვერენიტეტის ფასად“, რაც არსებითად რუსეთის ულტიმატუმია.
„ჩვენ მზად ვართ შეერთებულ შტატებთან კომპრომისებზე სასაუბროდ. თუმცა, არ გვინდა რუსებისგან განმეორებითი ულტიმატუმების მიღება. ისინი აგრესორები არიან. ყველამ აღიარა. ეს არ შეცვლილა...
რას გვთავაზობს რუსეთი კომპრომისის სახით? რის გაკეთებაზე არიან ისინი მზად? მათ თქვეს: „ჩვენ მზად ვართ არ დავიკავოთ თქვენი სხვა რეგიონები“. მაგრამ ეს ტერორიზმია. თავად სიტყვებიც კი ტერორიზმია. „მე მზად ვარ თქვენ არ მოგკლათ - მოგვეცით ყველაფერი“. რას ნიშნავს ეს? ეს კომპრომისი არ არის. ეს ულტიმატუმია. სწორედ ამიტომ ვთქვი: „ჩვენ მზად ვართ კომპრომისებისთვის, რომლებიც პატივს სცემენ უკრაინის სუვერენიტეტსა და ტერიტორიულ მთლიანობას, ჩვენს არმიას, ჩვენს ხალხს და ჩვენს შვილებს. მაგრამ ჩვენ არ ვართ მზად ულტიმატუმებისთვის“, - განაცხადა ზელენსკიმ.
