აშშ-ის სამხედრო ძალები ირანზე შესაძლო დარტყმებისთვის მზად არიან უკვე ამ შაბათს, თუმცა ნებისმიერი ქმედების დაწყების ვადები შესაძლოა გაგრძელდეს, რადგან აშშ-ის პრეზიდენტ დონალდ ტრამპს საბოლოო გადაწყვეტილება ჯერ არ მიუღია. ამის შესახებ CBS News წყაროებზე დაყრდნობით იუწყება.
მაღალინოსნების თქმით, ტრამპს ჯერ არ მიუღია საბოლოო გადაწყვეტილება ირანზე დარტყმის შესახებ. მსჯელობა გრძელდება, რადგან თეთრი სახლი აფასებს ესკალაციის რისკებს და პოლიტიკურ და სამხედრო შედეგებს.
ზოგიერთი წყაროს ცნობით, პენტაგონი უახლოესი სამი დღის განმავლობაში ახლო აღმოსავლეთის რეგიონიდან პერსონალის ნაწილს დროებით გაიყვანს, ძირითადად ევროპაში ან უკან, შეერთებულ შტატებში, იმ შემთხვევაში, თუ ირანი შესაძლო ქმედებებს ან კონტრშეტევას გადაწყვეტს, შეერთებული შტატების მიერ ოპერაციის გაგრძელების შემთხვევაში.
ერთ-ერთი წყაროს ცნობით, პენტაგონის მიერ რესურსებისა და პერსონალის გადანაწილება აშშ-ის შესაძლო სამხედრო მოქმედებების წინ სტანდარტული პრაქტიკაა და სულაც არ ნიშნავს, რომ ირანზე თავდასხმა გარდაუვალია.
თეთრი სახლის პრესმდივანმა, ქეროლაინ ლევიტმა, ოთხშაბათს გამართულ ბრიფინგზე განაცხადა, რომ ირანზე დარტყმის „მრავალი მიზეზი და არგუმენტი“ არსებობს, თუმცა დიპლომატია ყოველთვის პრეზიდენტის პირველი არჩევანია.
ამასთან, ლევიტმა არ უპასუხა შეკითხვას, იქნება თუ არა პოტენციური დარტყმა ისრაელთან კოორდინირებული.
ლევიტმა გაიხსენა, რომ ტრამპის ადმინისტრაციამ უკვე განახორციელა „ძალიან წარმატებული ოპერაცია ივნისში, რომელიც ირანის ბირთვული ობიექტების წინააღმდეგ იყო მიმართული“.
„ირანი ძალიან გონივრულად მოიქცევა, თუ პრეზიდენტ ტრამპთან და მის ადმინისტრაციასთან შეთანხმებას მიაღწევს,“ - განაცხადა ტრამპმა.
