განსაკუთრებული არაფერია იმაში, რომ ყველას უნდა ელაპარაკო, ჩვენც ამის მომხრე ვართ, მაგრამ მთავარია, რა პოზიციიდან ელაპარალები და ვისთან ერთად, – ამის შესახებ პარტიის „გახარია საქართველოსთვის“ წევრმა, დეპუტატმა გიორგი შარაშიძემ ბრიფინგზე განაცხადა.
„პრაგმატულია, რაც რეგიონში ხდება, როცა სომხეთი და აზერბაიჯანი ამერიკისგან უსაფრთხოებას უმაღლეს დონეზე იღებენ და ყველაფერი საქართველოს გარეშე ხდება? ეს არის „ოცნების“ პრაგმატული პოლიტიკა? რასაც პრაგმატულს უწოდებენ, ის პოლიტიკაა არაპრაგმატული. საქართველო რუსეთს სანქციებს არ და ვერ დაუწესებს, თუნდაც, საკუთარი ეკონომიკური მდგომარეობიდან გამომდინარე, მაგრამ მთავარია, საკუთარი ქვეყნის სტრატეგიულ კურსს ღალატობ თუ არა და მთავარ მტერთან, რუსეთთან კოლაბორაციაში შედიხარ თუ მასთან მხოლოდ დიალოგი და პრაგმატული პოლიტიკა გაქვს. კოლაბორაციაში შესვლა ნიშნავს, რა შედეგებიც გვაქვს, საქართველო საკუთარ როლს კარგავს არა მხოლოდ საერთაშორისო ასპარეზზე, არამედ სამხრეთ კავკასიის რეგიონშიც. მნიშვნელოვანი საკითხები საქართველოს გარეშე ხდება და ქვეყანა იგნორირებულია, როგორც რეგიონში მოთამაშე. ამაზე პასუხისმგებელი „ოცნებაა“.
თუ მეკითხებით, იყო თუ არა სწორი გადაწყვეტილება, საქართველო ომში რომ არ ჩაერთო, სწორი იყო. ის, რომ მშვიდობა შევინარჩუნეთ, სწორი იყო, მაგრამ ომში ჩართვისკენ ევროპა მოგვიწოდებდა? რასაც „ოცნება“ დიალოგს ეძახის, კოლაბორაციაა მთავარ მტერთან, რადგან სტრატეგიული როლი იკარგება. ყველაფერს აკეთებენ, რომ საქართველო ევროკავშირში გაწევრიანების დღის წესრიგიდან ამოვარდეს და რეგიონში მთავარ პარტნიორად არ განიხილებოდეს. ეს ყველაფერი რუსეთის მთავარ ინტერესებში არ შედის. „ოცნება“ ცდილობს, ქვეყანაში არსებული მშვიდობით გაამართლოს ის მავნებლური საგარეო პოლიტიკა, რასაც აწარმოებს“, – განაცხადა გიორგი შარაშიძემ.
