ევროკავშირმა ირანის ისლამური რევოლუციის გუშაგთა კორპუსი [IRGC] ტერორისტულ ორგანიზაციად გამოაცხადა, რითაც ის „ალ-ქაიდას“, „ჰამასსა“ და „ისლამურ სახელმწიფოსთან“ გათანაბრდა.
ამ გადაწყვეტილების კომენტირებისას, ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში კაია კალასმა განაცხადა: „[განსხვავებული აზრის] ჩახშობა უპასუხოდ არ უნდა დარჩეს. ნებისმიერი რეჟიმი, რომელიც ათასობით საკუთარ მოქალაქეს კლავს, საკუთარი კრახისთვის ემზადება“, -აღნიშნა კალასმა.
თავის მხრივ, გერმანიის საგარეო საქმეთა მინისტრმა იოჰან ვადეფულმა IRGC-ს და მის დამხმარე ძალებს „ირანის რეჟიმის ჯალათები“ უწოდა.
„ესენი არიან ისინი, ვინც წარმოუდგენელი სისასტიკით მოქმედებენ საკუთარი მოსახლეობის წინააღმდეგ და ფაქტობრივად სიკვდილით სჯიან თანამოქალაქეებს იმის გამო, რომ ისინი ბედავენ და ხმას იმაღლებენ ქუჩებში“, - აღნიშნა ვადეფულმა.
მანამდე ცნობილი გახდა, რომ ევროკავშირის საგარეო საქმეთა მინისტრები ირანის წინააღმდეგ ახალ სანქციებზე შეთანხმდნენ, რომლის მიზანიც იმ პირებსა და ორგანიზაციებისთვის სავიზო და ფინანსური სანქციების დაწესებაა, რომლებიც დემონსტრანტების წინააღმდეგ ძალადობრივ დარბევებსა და ქვეყნის მიერ რუსეთის მხარდაჭერაში მონაწილეობდნენ.
