სანქციები და შანტაჟის მექანიზმები არ მოქმედებს, ყველამ კარგად დაიმახსოვროს, - ასე უპასუხა "ქართული ოცნების" წევრმა, არჩილ გორდულაძემ "ფორმულას" ჟურნალისტის შეკითხვას როგორ შეაფასებდა ბრიტანეთის მხრიდან ივანიშვილის შესაძლო დასაქნცირების საკითხს.
"არაერთი წელია, ბატონი ბიძინა ივანიშვილის მიმართ დე ფაქტო სანქციები არსებობს. ეს შანტაჟის მექანიზმადაა გამოყენებული, რომ როგორმე ზეწოლა მოახდინონ იმისთვის, რომ საქართველოს ინტერესების საწინააღმდეგოდ იყოს გადაწყვეტილება მიღებული, მაგრამ ეს სანქციები და შანტაჟის მექანიზმები არ მოქმედებს, ყველამ კარგად დაიმახსოვროს.
ჩვენი პარტიის დამფუძნებლისა და საპატიო თავმჯდომარისთვის მატერიალური და ფინანსური რესურსები მთავარი არ არის - მთავარია, რა სჭირდება ქართველ ხალხს და ქართულ საზოგადოებას. შესაბამისად, სანქციებთან დაკავშირებით ეს განცხადებები უბრალოდ ღიმილისმომგვრელიც კი აღარაა, საერთოდ არავითარი მნიშვნელობა არ აქვს", - განაცხადა გორდულაძემ.
ცნობისათვის, დიდი ბრიტანეთის თემთა პალატის წევრმა, ფილ ბრიკელმა 8 იანვარს გამართულ სხდომაზე საქართველოს შესახებ ისაუბრა და ის ბიძინა ივანიშვილის დასანქცირების მოწოდებით გამოვიდა.
