ირანის უზენაეს ლიდერს, ალი ხამენეის, აქვს სარეზერვო გეგმა, გაიქცეს ქვეყნიდან, თუ მისი უსაფრთხოების ძალები ვერ შეძლებენ საპროტესტო აქციების ჩახშობას ან გაიქცევიან.

The Times-ის მიერ მოპოვებული სადაზვერვო ანგარიშის თანახმად, 86 წლის ხამენეი თეირანიდან გაქცევას თავის 20 თანაშემწესთან და ოჯახის წევრთან ერთად გეგმავს.

გეგმა სირიის ლიდერის, ბაშარ ალ-ასადის გაქცევას ეფუძნება, რომელიც დამასკოდან მოსკოვში თვითმფრინავით გაფრინდა, ვიდრე ოპოზიციის ძალები დედაქალაქს 2024 წლის დეკემბერში დაიკავებდნენ.

„გეგმა „B“ ხამენეისთვის, მისი ახლო წრისა და ოჯახისთვისაა, მათ შორის მისი ვაჟისთვის და ტახტის სავარაუდო მემკვიდრე მოჯტაბასთვის“, - განუცხადა The Times-ს დაზვერვის წყარომ და დასძინა, რომ ის გულისხმობს „აქტივების, საზღვარგარეთ არსებულ ქონებასა და ნაღდი ფულის შეგროვებას უსაფრთხო გადასვლის უზრუნველსაყოფად“.

ცნობილია, რომ ხამენეი ფლობს აქტივების ფართო ქსელს. 2013 წელს Reuters-ის მიერ ჩატარებული გამოძიების თანახმად, მისი მთლიანი აქტივები, მათ შორის უძრავი ქონება და კომპანიები, 95 მილიარდ დოლარად შეფასდა.

წყაროების ცნობით, გაქცევის გეგმა ამოქმედდება, თუ ხამენეი მიხვდება, რომ მისი უსაფრთხოების ძალები ბრძანებებს არ ასრულებენ. მიუხედავად იმისა, რომ ხამენეი იცავს თავის ერთგულ მომხრეებს, აკონტროლებს მნიშვნელოვან დანიშვნებსა და მათ უსაფრთხოებას, ასევე აღინიშნება, რომ ის „როგორც გონებრივად, ასევე ფიზიკურად დასუსტდა“ ისრაელთან გასული წლის ომის შემდეგ. ის იშვიათად ჩნდება საჯაროდ და, რაც მთავარია, ბოლო რამდენიმე დღის საპროტესტო აქციების დროს მის შესახებ არაფერი ისმის.