აშშ-ის ცენტრალური სადაზვერვო სააგენტო (CIA) აცხადებს, რომ უკრაინას არ უცდია რუსეთის პრეზიდენტის, ვლადიმირ პუტინის რეზიდენციაზე თავდასხმა ნოვგოროდის ოლქში, ვალდაიში, ამის შესახებ The Wall Street Journal წყაროებზე დაყრდნობით იუწყება.
ცენტრალური სადაზვერვო სააგენტოს დასკვნის თანახმად, უკრაინულმა დრონებმა 29 დეკემბრის ღამეს თავდასხმა სცადეს სამხედრო ობიექტზე იმავე რეგიონში, სადაც პუტინის რეზიდენცია მდებარეობს, თუმცა ობიექტი მის მახლობლად არ იყო განთავსებული.
როგორც WSJ აღნიშნავს, ამერიკულ დაზვერვას შეუძლია რუსეთის საჰაერო სივრცის, ასევე მის ტერიტორიაზე თავდასხმების მონიტორინგი, მათ შორის თანამგზავრებისა და რადარის გამოყენებით.
ცენტრალური სადაზვერვო სააგენტოს დირექტორმა, ჯონ რეტკლიფმა, დაზვერვის შედეგები აშშ-ის პრეზიდენტ დონალდ ტრამპს მიაწოდა.
მალევე, ტრამპმა სოციალურ ქსელში გააზიარა New York Post -ის სარედაქციო სტატიის ბმული, რომელშიც ნათქვამი იყო, რომ უკრაინას, პუტინის რეზიდენციაზე თავდასხმა არ უცდია.
ტრამპმა ბმულს თან დაურთო სტატიის სათაური: „პუტინის ხმამაღალი განცხადებები „თავდასხმის“ შესახებ აჩვენებს, რომ რუსეთია ის, ვინც ხელს უშლის მშვიდობას“.
შეგახსენებთ, რუსეთის საგარეო საქმეთა მინისტრმა სერგეი ლავროვმა 29 დეკემბერს განაცხადა, რომ უკრაინამ, თითქოს, რუსეთის ლიდერის, ვლადიმირ პუტინის რეზიდენციაზე თავდასხმა სცადა, რაც მოლაპარაკებასთან დაკავშირებით რუსეთის პოზიციის გადახედვას გამოიწვევს. ამასთან, რუსეთის პრეზიდენტის თანაშემწემ, იური უშაკოვმა განაცხადა, რომ ვლადიმირ პუტინმა დონალდ ტრამპს უკრაინის შეიარაღებული ძალების მიერ რუსეთის პრეზიდენტის რეზიდენციაზე თავდასხმის მცდელობის შესახებ აცნობა. უშაკოვის თქმით, პრეზიდენტი ტრამპი შოკირებული იყო.
