უკრაინის პრეზიდენტმა ვოლოდიმირ ზელენსკიმ განაცხადა, რომ შეერთებულმა შტატებმა უკრაინას 15-წლიანი უსაფრთხოების გარანტიები შესთავაზა, გახანგრძლივების შესაძლებლობით.
ამის შესახებ ზელენსკიმ Axios-თან ინტერვიუში ისაუბრა.
ზელენსკი მიიჩნევს, რომ ხმის მიცემის ორგანიზებისა და ჩატარებისთვის 60-დღიანი ცეცხლის შეწყვეტა აუცილებელი მინიმუმია, რადგან ასეთი რეფერენდუმის ჩატარება მნიშვნელოვან პოლიტიკურ, ლოკისტიკურ და უსაფრთხოების სირთულეებს გამოიწვევს.
აშშ-ის მაღალჩინოსანმა Axios-ს განუცხადა, რომ რუსებს ესმით ცეცხლის შეწყვეტის აუცილებლობა, თუ ზელენსკი რეფერენდუმს დანიშნავს, მაგრამ უფრო მოკლე ვადას ითხოვენ.
მან დასძინა, რომ კვლავ სურს ტერიტორიაზე უკეთესი პოზიციის მიღწევაზე მოლაპარაკება.
თუმცა, თუ გეგმა ამ საკითხთან დაკავშირებით „ძალიან რთულ“ გადაწყვეტილებას მოითხოვს, ზელენსკი მიიჩნევს, რომ საუკეთესო გამოსავალი მთელი 20-პუნქტიანი გეგმის რეფერენდუმზე გატანა იქნება.
პრეზიდენტმა ასევე აღნიშნა, რომ თუ ადამიანები უსაფრთხოების მიზნით ხმის მიცემაზე არ მივიდნენ, რეფერენდუმის შედეგი შესაძლოა არალეგიტიმური იყოს.
„უმჯობესია საერთოდ არ ჩატარდეს რეფერენდუმი, ვიდრე ჩატარდეს, რომლის დროსაც ხალხს არ ექნება მისვლისა და ხმის მიცემის შესაძლებლობა,“ - თქვა ზელენსკიმ.
ზელენსკიმ ასევე განაცხადა, რომ მისთვის ჯერ კიდევ გაურკვეველია, მზადაა თუ არა რუსეთი დათანხმდეს ტრამპის გეგმას.
„მე მაქვს გარკვეული სადაზვერვო მონაცემები... მაგრამ ახლა იმ ეტაპზე ვარ, როდესაც მინდა მხოლოდ ლიდერების სიტყვების დავიჯერო,“ - განაცხადა ზელენსკიმ.
უკრაინის პრეზიდენტის თქმით, აშშ-სა და უკრაინას შორის ორმხრივი შეთანხმებების უმეტესი ასპექტი უკვე განსაზღვრულია, თუმცა არის რამდენიმე „ტექნიკური საკითხი“, რომელიც შემდგომ განხილვას საჭიროებს.
Axios-ის ცნობით, ერთ-ერთი საკითხი შეთანხმების ხანგრძლივობაა; აშშ-მა 15-წლიანი პაქტი შესთავაზა, რომლის განახლებაც შესაძლებელია, თუმცა ზელენსკი მიიჩნევს, რომ უკრაინას 15 წელზე მეტი სჭირდება.
