უკრაინის პრეზიდენტმა ვოლოდიმირ ზელენსკიმ პირველად საჯაროდ წარმოადგინა ომის დასრულების შესახებ 20-პუნქტიანი დოკუმენტის პროექტი, რომელსაც მან უკრაინას, შეერთებულ შტატებს, ევროპასა და რუსეთს შორის ჩარჩო ან „ძირითადი დოკუმენტი“ უწოდა.
„ახლა მე მზად ვარ განვიხილო 20-პუნქტიანი დოკუმენტის პროექტი და ეს არის დოკუმენტი, რომელსაც ჩარჩო ჰქვია, ომის დასრულების საბაზისო დოკუმენტი, პოლიტიკური დოკუმენტი ჩვენს, ამერიკას, ევროპასა და რუსეთის ფედერაციას შორის“, - განუცხადა მან ჟურნალისტებს
პრეზიდენტმა აღნიშნა, რომ პროექტი მრავალი თვალსაზრისით ასახავს უკრაინისა და შეერთებული შტატების საერთო ხედვას და ნაწილობრივ, ამერიკული მხარის მიდგომას, თუმცა, მისი თქმით, რიგი პუნქტები კვლავ საჭიროებს შემდგომ გადახედვას და დამტკიცებას.
ზელენსკიმ ასევე აღნიშნა, რომ ამჟამად ამერიკულ მხარესთან არ არსებობს საერთო პოზიცია ორ საკითხზე: დონეცკის ოლქის ტერიტორიებსა და ზაპოროჟიეს ატომურ ელექტროსადგურზე.
ამავდროულად, მისი თქმით, სხვა საკითხებთან დაკავშირებით მხარეები „მნიშვნელოვნად დაახლოვდნენ“ და, ზოგადად, კონსენსუსი უკვე მიღწეულია.
გეგმის თანახმად:
- უკრაინის არმიის რიცხოვნობა 800 ათასი იქნება;
- აშშ, ნატო და ევროკავშირი უკრაინას მისცემენ ჩრდილოატლანტიკური ხელშეკრულების მეხუთე მუხლის(კოლექტიური თავდაცვა) მსგავს უსაფრთხოების გარანტიებს;
- რუსეთმა საკანონმდებლი დონეზე უნდა გაამყაროს უკრაინაზე თავდაუსხმელობის ვალდებულება;
- უკრაინა ევროკავშირის წევრი გახდება შეთანხმებით გაწერილ ვადაში;
- უკრაინა დარჩება არაბირთვულ სახელმწიფოდ;
- ზაპოროჟიეს ატომურ ელექტროსადგურს ერთობლივად მართავენ უკრაინა, რუსეთი და აშშ, თუმცა ზელენსკიმ აღნიშნა, რომ უკრაინა რუსეთის მონაწილეობას არ ეთანხმება;
- რუსეთი და უკრაინა იღებენ ვალდებულებას თავის საგანმანათლებლო სისტემებსა და საზოგადოებაში განავითარონ ტოლერანტობა და კულტურათა ურთიერთგაგება.
ყველაზე რთული ტერიტორიის საკითხია. უკრაინა მოითხოვს ცეცხლის შეწყვეტას ამჟამინდელი საბრძოლო მოქმედებების ფაქტობრივ ხაზზე, რუსეთი კი - დონეცკის ოლქიდან უკრაინის ჯარების სრულად გაყვანას.
კომპრომისის სახით აშშ-ის წინადადებაა დონეცკის ოლქში თავისუფალი ეკონომიკური ზონის შექმნა. პრეზიდენტ ზელენსკის განცხადებით, ამ წინადადებაზე უკრაინაში უნდა ჩატარდეს რეფერენდუმი, რომლის მოსამზადებლად საჭიროა 60 დღე და ცეცხლის რეალურად შეწყვეტა.
გეგმის პროექტის თანახმად:
- რუსეთმა ჯარები უნდა გაიყვანოს დნეტროპეტროვსკის, სუმის, ხარკოვის და ნიკოლაევის ოლქებიდან;
- შეთანხმების ხელმოწერის შემთხვევაში უკრაინა არჩევნებს რაც შეიძლება სწრაფად ჩაატარებს.
- შეთანხმების დაცვას მეთვალყურეობას გაუწევს მშვიდობის საბჭო აშშ-ის პრეზიდენტ დონალდ ტრამპის ხელმძღვანელობით. საბჭოში იქნებიან ნატოს და ევროპის სახელმწიფოების წარმომადგენლები.
