აშშ-ის სახელმწიფო დეპარტამენტმა სავიზო შეზღუდვა დაუწესა ყოფილ ევროკომისარ ტიერი ბრეტონსა და დეზინფორმაციასთან ბრძოლის ორგანიზაციების ხელმძღვანელებს. დონალდ ტრამპის ადმინისტრაციამ ისინი ამერიკული შეხედულებების ცენზურაში დაადანაშაულა. ინფორმაციას CNN ავრცელებს.
ხუთ პირს, რომელთა საქმიანობაც, ვაშინგტონის აზრით, საფრთხეს უქმნის სიტყვის თავისუფლებას და ტრამპის მოკავშირეების, კერძოდ, მილიარდერის, ილონ მასკის ინტერესებს, სავიზო შეზღუდვები დაეკისრა.
კერძოდ, სანქციები დაეკისრა ტიერი ბრეტონს, ყოფილ ევროკომისარს, რომელიც იყო ციფრული სერვისების შესახებ კანონის (DSA) ერთ-ერთი მთავარი ინიციატორი, რომელიც მსხვილ ტექნოლოგიურ კომპანიებს ავალდებულებს ებრძოლონ სიძულვილის ენასა და დეზინფორმაციას.
მის გარდა, სანქციები დაეკისრათ იმ ორგანიზაციების ხელმძღვანელებსაც, რომლებიც ინტერნეტში სახიფათო კონტენტს იკვლევენ.
მათ შორის არიან „ციფრული სიძულვილის წინააღმდეგ ბრძოლის ცენტრის“ (CCDH) აღმასრულებელი დირექტორი იმრან აჰმედი, „გლობალური დეზინფორმაციის ინდექსის“ (GDI) თანადამფუძნებელი კლერ მელფორდი და გერმანული არაკომერციული ორგანიზაცია HateAid-ის ორი თანამშრომელი - ანა-ლენა ფონ ჰოდენბერგი და ჯოზეფინ ბალონი.
აშშ-ის ადმინისტრაცია მიიჩნევს, რომ მათ კოორდინირებული ძალისხმევა განახორციელეს ამერიკული კომპანიების მოგების შეზღუდვისა და შეხედულებების ჩახშობის მიზნით, რომელიც მათ იდეოლოგიას ეწინააღმდეგებოდა.
სახელმწიფო დეპარტამენტის წარმომადგენლების თქმით, ევროპელი ლიდერები დეზინფორმაციის წინააღმდეგ ბრძოლას იმიგრაციის პოლიტიკის ოპონენტების დევნის ინსტრუმენტად იყენებენ.
აშშ-ის სახელმწიფო მდივანმა, მარკო რუბიომ, ხაზგასმით აღნიშნა, რომ ამ პირების შეერთებულ შტატებში შესვლას შესაძლოა ნეგატიური შედეგები მოჰყვეს ქვეყნის საგარეო პოლიტიკაზე.
აშშ-ის საშინაო უსაფრთხოების დეპარტამენტი ასევე განიხილავს ამ ორგანიზაციებთან დაკავშირებული პირების დეპორტაციის პროცედურების დაწყებას.
