კვირას, 18 ოქტომბერს, აშშ-ის პრეზიდენტ დონალდ ტრამპის პოლიტიკის წინააღმდეგ საპროტესტო აქციები ლოზუნგით „არა მეფეებს“ აშშ-ის 50-ვე შტატში, ასევე მექსიკაში, კანადასა და ევროპის ბევრ ქვეყანაში გაიმართა.
საპროტესტო აქციები აშშ-ის მთავრობის მიმდინარე „შათდაუნის“ ფონზე გაიმართა, რომელშიც დემოკრატიული და რესპუბლიკური პარტიების წარმომადგენლები ერთმანეთს ადანაშაულებენ.
დემონსტრანტები ასევე აპროტესტებენ პრეზიდენტის „ძალაუფლების ავტორიტარულ მიტაცებას“ და იმიგრაციის პოლიტიკას, რაც მოიცავს ეროვნული გვარდიის განლაგებას ამერიკის დიდ ქალაქებში არალეგალური იმიგრანტების წინააღმდეგ ჩატარებული რეიდების ფონზე.
ქუჩებში გამოსულ მომიტინგეებს ეჭირათ ეროვნული დროშები და პლაკატები სლოგანებით - როგორიცაა „ არა მეფეებს“, „მილიარდერები კლავენ აშშ-ს“, „მოაშორეთ რეჟიმი“, „დემოკრატია და არა მონარქია“ და სხვა.
ორგანიზატორების თქმით, შეერთებული შტატების 2700 ქალაქში გამართულ ღონისძიებებშუ თითქმის შვიდი მილიონი ამერიკელი მონაწილეობდა.
მიტინგები გაიმართა ვაშინგტონში, ბოსტონში, ატლანტაში, ჩიკაგოში, ლოს ანჯელესში, პიტსბურგსა და სხვა ქალაქებში.
„ეს მოძრაობა არ არის ერთჯერადი პროტესტი. ეს არის ამერიკელების მზარდი გუნდი, რომლებსაც არ სურთ, რომ მათ მართავდნენ. ტრამპს შეიძლება გვირგვინი სურდეს, მაგრამ ამ ქვეყანაში მეფეები არ არიან“, - აღნიშნავენ აქციების ორგანიზატორები.
