ისრაელის მთავრობა კვირას, 10 აგვისტოს ათიათასობით რეზერვისტის მობილიზაციის გამოცხადებას აპირებს, რათა პრემიერ-მინისტრ ბენიამინ ნეთანიაჰუს გეგმა ღაზის სექტორის სრული ოკუპაციის შესახებ სისრულეში მოვიდეს. ინფორმაციას ისრაელის მედია ავრცელებს.
გავრცელებული ცნობებით, მობილიზაცია უფრო ფართომასშტაბიანი სამხედრო ოპერაციის ნაწილი იქნება, რომელიც მიზნად ისახავს მთავრობის გეგმის განხორციელებას ღაზის სექტორის სრულად აღების შესახებ.
ისრაელის თავდაცვის ძალები (IDF) ქალაქ ღაზის ტერიტორიების მასიური დაბომბვისა და დაკავებისთვის და მშვიდობიანი მოსახლეობის ნაწილის სამხრეთისკენ გადასახლებისთვის ემზადებიან. გენერალური შტაბის უფროსმა, ეიალ ზამირმა, ბრძანა, რომ ქალაქში მძევლებისთვის რისკები მინიმუმამდე იქნას დაყვანილი.
ამავდროულად, მან გააპროტესტა ისრაელის უსაფრთხოების კაბინეტის მიერ 7-8 აგვისტოს ღამეს მიღებული გადაწყვეტილება და მას სერიოზული შეცდომა უწოდა.
„თუ ამაზე წახვალთ, ომის მიზნებიდან გამომდინარე მძევლების გათავისუფლებას გამორიცხავთ“, - განაცხადა ზამირმა. მან ასევე მოუწოდა ღაზაში საავადმყოფოების მშენებლობისკენ, რადგან ადგილზე სამოქალაქო ინფრასტრუქტურა ფაქტობრივად აღარ არსებობს.
ზამირმა ასევე აღნიშნა, რომ ღაზის მილიონამდე მცხოვრებისთვის ჰუმანიტარული დახმარების გარეშე, გეგმას კატასტროფული შედეგები მოჰყვება და მძევლების გათავისუფლებას შეუძლებელს გახდის.
ცნოვისათვის, 8 აგვისტოს, ისრაელის სამხედრო-პოლიტიკურმა კაბინეტმა დაამტკიცა გეგმა ქალაქ ღაზაზე სრული კონტროლის დამყარების შესახებ.
