პარასკევს, ვაშინგტონში აზერბაიჯანისა და სომხეთის ლიდერების დაგეგმილ შეხვედრაზე, სავარაუდოდ, ხელი მოეწერება „ჩარჩო სამშვიდობო შეთანხმებას“, რომელიც აშშ-ს სამხრეთ კავკასიაში სტრატეგიული სატრანზიტო დერეფნის განვითარების ექსკლუზიურ უფლებებს ანიჭებს. ამის შესახებ Reuters იუწყება.
ანგარიშში ნათქვამია, რომ სომხეთის პრემიერ-მინისტრი ნიკოლ ფაშინიანი და აზერბაიჯანის პრეზიდენტი ილჰამ ალიევი შეერთებულ შტატებში ხელს მოაწერენ ჩარჩო შეთანხმებას, რომელიც მიზნად ისახავს „მშვიდობისკენ მიმავალი კონკრეტული გზის“ მიღწევას.
Reuters-ოს ცნობით, შეთანხმების ერთი ნაწილი სომხეთის გავლით სატრანსპორტო დერეფანს შეეხება, რომელიც აზერბაიჯანულ ანკლავს, ნახიჩევანს, აზერბაიჯანის დანარჩენ ნაწილთან დააკავშირებს.
აშშ-ის ოფიციალურმა პირებმა სააგენტოს განუცხადეს, რომ სომხეთი დათანხმდება შეერთებულ შტატებს მიენიჭოს ექსკლუზიური უფლებები სატრანზიტო დერეფნის განვითარებაზე, რომელსაც ტრამპის მარშრუტი საერთაშორისო მშვიდობისა და კეთილდღეობისთვის (TRIPP) დაერქმევა.
სააგენტო წერს, რომ ეს მარშრუტი იმუშავებს სომხეთის კანონმდებლობით, ხოლო აშშ მიწას გადასცემს იჯარით კონსორციუმს, რათა ააშენოს ინფრასტრუქტურა და მართოს ის.
„კომერციული მექანიზმების საშუალებით ეს ნაბიჯი გახსნის რეგიონის პოტენციალს და ხელს შეუწყობს სამხედრო მოქმედებების პრევენციას“, – განაცხადა ამერიკელმა მაღალჩინოსანმა „როიტერთან“ საუბარში.
ამასთან, სომხეთის და აზერბაიჯანის ლიდერები ხელს მოაწერენ დოკუმენტს „მინსკის ჯგუფის“ დაშლის მოთხოვნის შესახებ.
