დონალდ ტრამპის ადმინისტრაცია განიხილავს რუსეთის ნავთობტანკერების „ჩრდილოვანი ფლოტისთვის“ ახალი ეკონომიკური სანქციების დაწესების საკითხს, თუ რუსეთის ლიდერი ვლადიმირ პუტინი 8 აგვისტომდე უკრაინაში ცეცხლის შეწყვეტას არ დათანხმდება. ამის შესახებ Financial Times წყაროებზე დაყრდნობით იუწყება.
წყაროების ცნობით, ტრამპის ადმინისტრაცია რუსეთის „ჩრდილოვანი ფლოტის“ წინააღმდეგ დამატებით სანქციებს განიხილავს - ეს არის მოძველებული ტანკერების ქსელი, რომელსაც კრემლი დასავლეთის სანქციების საწინააღმდეგოდ ნავთობის ტრანსპორტირებისთვის იყენებს.
ეს ნაბიჯები შესაძლოა ტრამპის თეთრ სახლში დაბრუნების შემდეგ მოსკოვის წინააღმდეგ აშშ-ის ახალი სანქციების პირველი მაგალითი იყოს.
გამოცემის ცნობით, ახალი სანქციები კრემლზე ზეწოლის გაზრდის სტრატეგიის პირველ ნაბიჯად განიხილება.
პრეზიდენტმა ტრამპმა, რომელიც აქამდე მკაცრი ზომების მიღებისგან თავს იკავებდა, ახლა პუტინს ულტიმატუმი წაუყენა: ან პარასკევამდე დათანხმდეს სამშვიდობო შეთანხმებას, ან მკაცრი სანქციები დაეკისრება.
სწორედ 8 აგვისტოს იწურება იმ ულტიმატუმის ვადა, რომელიც დონალდ ტრამპმა ვლადიმერ პუტინს დაუწესა უკრაინაში ომის შეწყვეტისთვის.
